: रूसले भूस्थल युद्धमा ठोस प्रगति गर्न संघर्ष गरिरहेको बेला युक्रेनमा हवाई आक्रमणहरू तीव्र रूपमा बढाइरहेको छ । रूसका हवाई आक्रमणहरू पछिल्ला महिनाहरूमा मात्रा र तीव्रतामा उल्लेखनीय रूपमा बढेका छन् । मस्कोका सेनाहरू जमिनमा उल्लेखनीय सफलता हासिल गर्न असफल भइरहेका बेला युक्रेनमाथि पहिलेभन्दा धेरै ड्रोन र उच्च–गतिका क्षेप्यास्त्रहरू प्रयोग गरेर आक्रमण गरिएको छ ।
यी विशाल आक्रमणहरूको उद्देश्य युक्रेनी वायु–रक्षा प्रणालीलाई थकित र कमजोर बनाउनु हो । ठूलो संख्यामा सस्ता ड्रोनहरू, त्यसपछि तीव्र गतिका ब्यालिस्टिक मिसाइलहरू र त्यसपछि क्रुज मिसाइलहरू क्रमबद्ध रूपमा प्रक्षेपण गरेर अधिकतम क्षति पुर्याउने रणनीति अपनाइएको छ । विज्ञहरूका अनुसार यस्तो ‘ओभरवेल्म’ रणनीतिले केही क्षेप्यास्त्रहरूलाई अवरोध बिना लक्ष्यमा पुग्न मद्दत गर्छ ।
मंगलबारको पछिल्लो ठूलो आक्रमणमा आठ वटा उच्च–गतिका मिसाइलहरू पनि प्रयोग गरिएका थिए—जसलाई लगभग रोक्न असम्भव मानिन्छ र विमानवाहक युद्धपोतहरू नष्ट गर्न सक्ने क्षमता राख्छन् । युक्रेनी अधिकारीहरूका अनुसार यी आठ वटै हाइपरसोनिक मिसाइललाई रोक्न सकिएन, जुन एकै आक्रमणमा अहिलेसम्मकै सबैभन्दा धेरै प्रयोग हो ।
यो आक्रमणमा युक्रेनभर २३ जनाको मृत्यु भएको र १५१ जना घाइते भएको बताइएको छ । विज्ञहरूका अनुसार यस्ता आक्रमणहरू केवल भौतिक क्षति मात्र होइन, नागरिकहरूमा डर फैलाउने र युक्रेनी नेतृत्वमाथि युद्ध अन्त्य गर्न दबाब सिर्जना गर्ने व्यापक रणनीतिको हिस्सा पनि हुन् । युद्ध मैदानमा ठोस उपलब्धि घट्दै गएको कारण हवाई आक्रमण बढेको विश्लेषकहरूको भनाइ छ । बेलायतस्थित थिंक ट्याङ्कका सैन्य विज्ञानसम्बन्धी सह–सहयोगी थॉमस विथिङ्टनले भने, ‘यदि रूस जमिनमा ठूलो प्रगति गर्न असमर्थ छ भने उसको दबाब दिने मुख्य उपाय नै हवाई शक्ति बन्न पुग्छ ।’
अप्रिल महिनामा युक्रेनले सन् २०२४ पछि पहिलो पटक रूसले कब्जा गरेको भन्दा बढी भूमि फिर्ता लिएको बताइएको छ । विश्लेषकहरूका अनुसार रूसले महिनामा करिब ५,००० अहेड ड्रोन प्रहार गर्ने गथ्र्यो, जुन पछिल्लो समय बढेर ८,००० भन्दा बढी पुगेको छ । यद्यपि केही ड्रोनहरू लक्ष्यमा पुगेर नागरिक तथा पूर्वाधारमा क्षति पु¥याउँछन् । विश्लेषकहरूका अनुसार युक्रेनको वायु–रक्षा प्रणालीले समग्र रूपमा राम्रो प्रदर्शन गरिरहेको छ ।
युक्रेनले करिब ९० प्रतिशत ड्रोनहरू रोकिरहेको छ र केहीलाई इलेक्ट्रोनिक युद्ध प्रणालीमार्फत दिशाहीन बनाइरहेको छ । तर ब्यालिस्टिक मिसाइल र जिरकन जस्ता हाइपरसोनिक मिसाइलहरू रोक्न युक्रेनलाई बढी कठिनाइ भइरहेको छ, किनकि यी अत्यन्त उच्च गतिमा चल्छन् र तिनीहरूलाई रोक्न अत्याधुनिक इन्टरसेप्टर आवश्यक पर्छ । मंगलबारको आक्रमणमा ४१ ब्यालिस्टिक मिसाइलहरू प्रयोग गरिएका थिए, जुन गत महिनाभर रूसले प्रहार गरेको संख्याभन्दा पनि बढी हो । तीमध्ये ३० वटा आफ्नो लक्ष्यमा पुगे ।
