: भारतको ऋषिकेशस्थित जूना अखडाका पूज्य आचार्य महामण्डलेश्वर स्वामी अवधेशानन्द गिरीले नेपालको आध्यात्मिक महिमा र सांस्कृतिक गौरवको प्रशंसा गरेका छन्।
हिन्दू स्वयंसेवक संघ नेपालको आयोजनामा कमलादीस्थित नेपाल प्रज्ञा प्रतिष्ठानमा आयोजित ‘प्रबुद्ध नागरिक गोष्ठी’लाई प्रमुख अतिथिका रूपमा सम्बोधन गर्दै उनले नेपाललाई ‘देवभूमि’का रूपमा विश्वसामु स्थापित गर्न खेलेको भूमिकाको उच्च प्रशंसा गरेका हुन्।
सांस्कृतिक ऐक्यबद्धता र कुमारी परम्पराको सम्मान
कार्यक्रमको आरम्भ नेपालको विविधता र मौलिकता झल्काउने सांस्कृतिक प्रस्तुतिहरूसँग भएको थियो। कार्यक्रममा छलिया नृत्य, सखिया नृत्य, मञ्जुश्री नृत्य, बाँसुरी वादन तथा शिवसतीको कथानकमा आधारित नृत्य राखिएको थियो। मञ्चमा पूर्व कुमारी (माजु) ट्रिस्ना शाक्य थिइन्।
पूर्व कुमारीको उपस्थितितर्फ लक्षित गर्दै स्वामी अवधेशानन्द गिरीले भने, ‘राष्ट्रदेवी राजराजेश्वरी तलेजु भवानीको जीवन्त स्वरूप मानिने कुमारीका सामु शिर निहुराउन पाउँदा म आफूलाई धन्य र आह्लादित महसुस गरिरहेको छु। नेपाललाई देवभूमिको रूपमा चिनाउने सरकारी प्रयास अत्यन्तै सराहनीय छ।’
उनले नेपाल र भारतको सांस्कृतिक तथा आध्यात्मिक चेतना अभिन्न रहेको चर्चा गर्दै नेपाल एक सार्वभौम राष्ट्र भएको तथ्यलाई स्मरण गराए। उनले माता जानकीलाई ‘नेपालकी छोरी र भारतकी भाग्य विधाता’का रूपमा वर्णन गर्दै दुई देशबीचको अटुट सम्बन्धमा जोड दिए।
नैतिक जागरण र राष्ट्र निर्माणको आह्वान
समाज रूपान्तरण र राष्ट्र निर्माणमा बौद्धिक वर्गको भूमिकाबारे प्रकाश पार्दै स्वामीजीले वर्तमान समयमा सनातन संस्कृतिमाथि आइपरेका चुनौतीप्रति सचेत रहन आग्रह गरे। उनले भने, ‘हामीलाई जाति, भाषा र सम्प्रदायका आधारमा विभाजित गर्ने प्रयास भइरहेका छन्। यस्तो अवस्थामा ‘हामी एक हौं’ भन्ने भावलाई हृदयङ्गम गर्दै सतर्क रहनु आवश्यक छ।’
उनले पाश्चात्य र पूर्वीय दृष्टिकोणबीचको भिन्नता स्पष्ट पार्दै भने,‘पाश्चात्य संस्कृतिका लागि संसार एउटा ‘बजार’ मात्र हो, तर हाम्रो सनातन संस्कृतिले संसारलाई ‘परिवार’ (वसुधैव कुटुम्बकम्) मान्छ। यहाँ सबैमा एकात्मता र आत्मवत् भाव निहित छ।’
