: अमेरिकी अधिकारीहरूले इजरायल र हिज्बुल्लाहबीच युद्धविरामका लागि सहमति भएको दावी गरेका छन् । यो सहमति दक्षिणी लेबनानमा इजरायलले गरेको तीव्र हवाई आक्रमणपछि आएको हो, जसमा ४७ जनाको मृत्यु भएको बताइएको छ ।
युद्धविरामको घोषणा हुनु अघि भएका झडपहरूमा हिज्बुल्लाहले लेबनानभित्र चार जना इजरायली सैनिकलाई मार्न सफल भएको जनाएको थियो । यी घटनाले अमेरिका–इरान युद्ध अन्त्य गर्न गरिएको सम्झौतामा असर पर्ने चिन्ता बढाएको थियो । इजरायली सेनाले युद्धविराम लागू भएको पुष्टि गरेको छ। तर पछि सेनाका प्रवक्ताले ‘तत्काल खतराहरू हटाउने कार्य जारी रहने’ बताएका छन् । हिज्बुल्लाहले औपचारिक रूपमा युद्धविरामको पुष्टि नगरे पनि उसका महासचिव शेख नइम कासिमले भने, ‘हिज्बुल्लाहलाई समाप्त गर्ने योजना असफल भएको छ ।’
युद्धविरामपछि पनि हवाई आक्रमण
लेबनानको नबातियेह शहरका उद्धारकर्मीहरूका अनुसार स्थानीय समय अनुसार साँझ ४ बजे युद्धविराम लागू भएपछि पनि कम्तीमा १२ वटा हवाई आक्रमण भएका छन् । यसले अमेरिकी राष्ट्रपति डोनाल्ड ट्रम्पले इरानसँग गरेको सम्झौताको भविष्यबारे प्रश्न उठाएको छ । सम्झौतामा अमेरिका–इरान युद्धविरामसँगै लेबनानमा पनि युद्धविरामको व्यवस्था गरिएको थियो । तर जमिनमा अवस्था त्यसअनुसार देखिएको छैन । इरानले ट्रम्पमाथि इजरायललाई नियन्त्रण गर्न नसकेको आरोप लगाएको छ । ट्रम्प स्वयंले पनि आफ्ना सहयोगी इजरायली प्रधानमन्त्री बेन्जामिन तेहन्याहूमाथि नागरिकको अनावश्यक हत्या गरेको आरोप लगाएका छन् ।
इजरायलको कडा प्रतिक्रिया
इजरायलका अति दक्षिणपन्थी राष्ट्रिय सुरक्षा मन्त्री इतामार बेन–गभिरले चार सैनिकको मृत्युबारे प्रतिक्रिया दिँदै भने, ‘लेबनान जल्नु पर्छ । प्रत्येक इजरायली आमाको आँशुका बदलामा एक हजार लेबनानी आमाहरू रुनुपर्छ ।’ यसको जवाफमा इरानी विदेशमन्त्री अब्बास अराघचीले इजरायल ‘स्थायी युद्ध चाहने’ पक्ष भएको आरोप लगाए । उनले सम्झौताको कुनै पनि उल्लंघनको जिम्मेवारी अमेरिकामाथि पनि जाने चेतावनी दिए ।
दुवै पक्षमा दबाब
प्रधानमन्त्री नेतन्याहूमाथि हिज्बुल्लाहविरुद्ध सैन्य कारबाही जारी राख्न आन्तरिक दबाब छ । अर्कोतर्फ, इरान समर्थित हिज्बुल्लाहले दक्षिणी लेबनानबाट इजरायली सेना नहटेसम्म आक्रमण जारी राख्ने जनाएको छ । युद्धविराम घोषणा भएपछि इजरायली सेनाका प्रवक्ता एफी डेफ्रिनले भने, ‘हामी तत्काल खतराहरू हटाउने, हिज्बुल्लाहका उल्लंघनको जवाफ दिने र आफ्ना नागरिकको सुरक्षा सुनिश्चित गर्ने काम जारी राख्नेछौं ।’
हिज्बुल्लाहका नेता नइम कासिमले पनि प्रतिक्रिया दिँदै भने, ‘हिज्बुल्लाहलाई समाप्त गर्ने योजना असफल भयो र इजरायलले हाम्रो भूमिको अन्तिम इन्चसम्म छोड्नु पर्नेछ ।’
ठूलो मानवीय क्षति
हिज्बुल्लाहले दक्षिणी लेबनानमा इजरायली सैनिकमाथि घात लगाएर आक्रमण गरेको, तीनवटा ट्यांक निर्देशित मिसाइलबाट नष्ट गरेको तथा रकेट र तोप आक्रमण गरेको दाबी गरेको छ । यस क्रममा एक बटालियन कमाण्डरसहित चार इजरायली सैनिक मारिएका थिए । लेबनानको स्वास्थ्य मन्त्रालयका अनुसार पछिल्लो इजरायली हवाई आक्रमणमा ४७ जनाको मृत्यु भएको छ भने ९७ जना घाइते भएका छन्। मृतकमध्ये महिला र बालबालिकासमेत रहेका छन् ।
सन् २०२५ मा सुरु भएको पछिल्लो द्वन्द्वयता लेबनानमा ३,९०० भन्दा बढी मानिसको मृत्यु भइसकेको छ भने ११,६०० भन्दा बढी घाइते भएका छन् । करिब १० लाख मानिस अझै विस्थापित अवस्थामा रहेका छन् र दक्षिणका दर्जनौँ बस्तीहरू पूर्ण रूपमा ध्वस्त भएका छन् ।
