: अमेरिकी राष्ट्रपति डोनाल्ड ट्रम्पले इरानसँगकाे वार्तामा भएको प्रगति 'सकारात्मक' रहेको बताएका छन्। हालै कतारमा भएका बैठकहरू समेत सकारात्मक रहेको उनको दाबी छ।
बुधबार नर्थ डकोटाका लागि प्रस्थान गर्नुअघि पत्रकारहरूसँग कुरा गर्दै राष्ट्रपति ट्रम्पले इरानको आणविक कार्यक्रम कटौती गर्ने दिशामा प्रक्रिया सही मार्गमा अघि बढिरहेको उल्लेख गरे। एक प्रश्नको जवाफमा ट्रम्पले दुवै पक्षबीच निकै राम्रो छलफल भएको बताउँदै भने, 'अब अगाडि के हुन्छ, त्यो भने हेर्न बाँकी नै छ।'
राष्ट्रपति ट्रम्पले अमेरिकाले इरानमाथि दबाब कायम राखेको भए तापनि वार्ताको प्रक्रिया निरन्तर अगाडि बढिरहेको स्पष्ट पारे।
अर्कातर्फ, इरानले भने आफ्नो आणविक कार्यक्रम पूर्ण रूपमा शान्तिपूर्ण उद्देश्यका लागि मात्र भएको दाबी गर्दै आएको छ। कतारको राजधानी दोहामा इरान र अमेरिकाबीच भएकाे अप्रत्यक्ष प्राविधिक वार्तामा कतार र पाकिस्तानले मध्यस्थकर्ताको भूमिका खेलेका छन्।
