: खुला सीमा नाकाका कारण भारतबाट लागूऔषध ब्राउनसुगर दैनिक भित्रिरहँदा यहाँका सुरक्षा निकायलाई नियन्त्रणमा चुनौती थपिरहेको बेला भारतीय सुरक्षा निकायले दुई स्थानबाट तीन जना ब्राउनसुगर कारोबारीलाई करिब साढे २३ लाख नेपाली रुपैयाँसहित पक्राउ गरेको छ ।
भारतीय सुरक्षा निकायले ब्राउनसुगर नेपाल सप्लाई गर्ने तयारी गरिरहेको गोप्य सूचनाको आधारमा किशनगञ्ज जिल्ला अन्तर्गत गलगलिया र दिघलबैंक क्षेत्रमा छापा मारेर ६२३ ग्राम ब्राउन सुगर बरामद गरेको छ । यो भारतीय सुरक्षा निकायको ठूलो सफलता हो ।
भद्रपुर सीमा पारी भारतको गलगलिया थाना क्षेत्रको लकडी डिपो गाउँ (भातगाँउ पञ्चायत) स्थित गलगलिया रेलवे स्टेशन नजिक एसएसबीको ४१औँ बटालियन र गलगलिया प्रहरीको संयुक्त प्रहरी टोलीले मंगलबार बिहान करिब ५:३४ बजेको समयमा छापा मारेर ५४३ ग्राम ब्राउन सुगरसहित दुई जनालाई पक्राउ गरेको छ ।
संयुक्त प्रहरी टोलीले लागूऔषधविरुद्ध ठूलो कारबाही गर्दै पाँच वटा छुट्टाछुट्टै पोलिथिन प्याकेटमा लुकाएर राखिएको जम्मा ५४३ ग्राम ब्राउन सुगर बरामद गरेको भारतीय प्रहरीले जनाएको छ । बरामद गरिएको ब्राउन सुगरमध्ये पहिलो प्याकेटमा ११९ ग्राम, दोस्रोमा १०६ ग्राम, तेस्रोमा १२० ग्राम, चौथोमा ९७ ग्राम र पाँचौँ प्याकेटमा १०१ ग्राम रहेको थियो ।
कारबाहीका क्रममा ४६ वर्षीय मोहम्मद फारुख र २३ वर्षीय मोहम्मद उमर पक्राउ परेका छन् । नातामा बुबा-छोरा पर्ने उनीहरू गलगलिया थाना अन्तर्गत लकडी डिपो गाउँका बासिन्दा हुन् । लागूऔषधको कारोबार गर्दै आइरहेका बुबा-छोरा ब्राउनसुगर भद्रपुर नाकाबाट नेपाल पठाउँदै आइरहेको प्रारम्भिक अनुसन्धानबाट खुलेको छ ।
प्रहरीले घटनास्थलबाट दुई थान मोबाइल फोन, भारतीय रुपैयाँ १ लाख ९० हजार र तथा नेपाली ६४० रुपैयाँ समेत बरामद गरेको जनाएको छ । पक्राउ परेका दुवै जनालाई थप अनुसन्धान र कानुनी कारबाहीका लागि गलगलिया प्रहरीको जिम्मा लगाइएको छ । उनीहरूमाथि भारतको एनडीपीएस ऐन अन्तर्गत मुद्दा चलाइने बताइएको छ ।
त्यस्तै किशनगञ्ज प्रहरी र एसएसबीको संयुक्त टोलीले झापा गाउँपालिकासँग जोडिएको सीमा पारी दिघलबैंक थाना क्षेत्रको मोहमारी खरवार टोल बस्ने शाहनवाज हुसेनलाई ८० ग्राम ब्राउन सुगरसहित पक्राउ गरिएको हो । उनको घरमा छापा मारेर संयुक्त टोलीले नेपाली २३ लाख ४७ हजार ९०० नेपाली र ३० हजार ५५० भारतीय रुपैयाँ पनि बरामद गरेको भारतीय प्रहरीले जनाएको छ । गोप्य सूचनाको आधारमा संयुक्त टोलीले खोजतलास गर्ने क्रममा कारोबारीबाट ६ वटा मोबाइल फोन र एउटा डिजिटल तराजु पनि बरामद भएको छ । बरामद भएको ठूलो मात्रामा नेपाली मुद्रालाई ध्यानमा राख्दै, अनुसन्धान एजेन्सीहरूले यो मुद्दा अन्तर्राष्ट्रिय तस्करी नेटवर्कसँग जोडिएको आशंका गरेका छन् ।
प्रारम्भिक अनुसन्धानले अभियुक्तको नेपालमा सक्रिय तस्करहरूसँग सम्बन्ध हुन सक्ने देखाएको छ । बरामद गरिएका मोबाइल फोनहरूको जाँच गरी उसको नेटवर्क र अन्य सहयोगीहरूको बारेमा जानकारी सङ्कलन गरी थप कारबाही अघि बढाउने जनाइएको छ । यस लागूऔषधको सञ्जालमा संलग्न अन्य व्यक्तिहरूको पनि खोजी भइरहेको छ । प्रहरीले अभियुक्त शाहनवाजविरुद्ध एनडीपीएस ऐन अन्तर्गत मुद्दा दर्ता गरेको छ ।
