: इरानका सर्वोच्च नेता आयतुल्लाह अली खामेनीको अन्त्येष्टि समारोह तेहरानमा सुरु भएको छ। इरानी सञ्चारमाध्यमहरूका अनुसार अन्त्येष्टि कार्यक्रममा लाखौँको संख्यामा सर्वसाधारणको उपस्थिति रहेको छ। विभिन्न मिडिया आउटलेटहरूले सार्वजनिक गरेका तस्बिर र भिडियोहरूमा समारोहमा जनसागर उर्लिएको देखिन्छ। विशेष भीडभाडलाई मध्यनजर गर्दै राजधानी तेहरान र धार्मिक सहर कोममा विशेष ट्राफिक नियम र सुरक्षा व्यवस्था लागू गरिएको छ।
यसैबीच, आइतबार आयोजित मुख्य समारोहमा इरानी नेता तथा खामेनीका छोरा मोज्तबा खामेनी र परिवारका केही मुख्य सदस्यहरू अनुपस्थित रहेका छन्। उनको अनुपस्थितिलाई अर्थपूर्ण रूपमा हेरिए पनि केही घण्टापछि नै मोज्तबाको तर्फबाट एउटा आधिकारिक सन्देश जारी गरिएको छ। उक्त सन्देशमा गुलामहुसेन मोहसेनी एजेईलाई पुनः इरानको न्यायपालिका प्रमुखको रूपमा जिम्मेवारी सुम्पिएको उल्लेख छ।
अमेरिकी र इजरायली सैन्य आक्रमणमा मारिएका सर्वोच्च नेता खामेनी र उनका परिवारका सदस्यहरूको जनाजाको नमाज आइतबार तेहरानको प्रसिद्ध धार्मिक तथा सांस्कृतिक केन्द्र 'इमाम खुमेनी मस्जिद' मा अदा गरिएको थियो। उक्त विशेष प्रार्थनाको नेतृत्व वरिष्ठ धर्मगुरु आयतुल्लाह जाफर सोभानीले गरेका थिए।
इरानी अधिकारीहरूका अनुसार आगामी केही दिनसम्म इरान र इराकका विभिन्न सहरहरूमा चल्ने यस अन्त्येष्टिमा झन्डै डेढदेखि दुई करोड मानिस सहभागी हुने अनुमान गरिएको छ।
अन्त्येष्टि कार्यक्रमको विस्तृत तालिका:
जुलाई ३–४: तेहरानस्थित इमाम खुमेनी मस्जिदमा धार्मिक विधिपूर्वक अन्त्येष्टिका औपचारिकताहरू सुरु।
जुलाई ५–६: खामेनीको पार्थिव शरीरलाई सर्वसाधारणको अन्तिम श्रद्धाञ्जलीका लागि खुला राखिएको।
जुलाई ७: पार्थिव शरीरलाई पवित्र सहर कोम लगिने र जमकरान मस्जिदमा विशेष प्रार्थना (जनाजाको नमाज) गरिने।
जुलाई ८: शवलाई छिमेकी मुलुक इराकको नजफ पुर्याइने, जहाँ इमाम अली दर्गाहसम्म विशाल शवयात्रा गरिएपछि कर्बलामा अन्तिम संस्कार सम्पन्न गरिने।
