— वीरगञ्ज नाकाबाट चालु आर्थिक वर्ष २०८२र८३ को जेठसम्म प्रमुख दलहनको आयात उल्लेख्य रूपमा घटेको छ। मुसुरो, सिमी–राज्मा, रहर र अन्य गेडागुडीको आयात घट्दा केराउ र बकुल्लाको आयात भने बढेको देखिएको छ।
वीरगञ्ज भन्सार कार्यालयको तथ्यांक अनुसार चालु आवको जेठसम्म ९ अर्ब ११ करोड ४० लाख रुपैयाँ बराबरको मुसुरो, सिमी–राजमा, चना, अन्य गेडागुडी, रहर, केराउ र बकुल्ला गरी ९ करोड १३ लाख ६० हजार ९ सय ५६ किलो दलहन आयात भएको छ।
गत आर्थिक वर्षको सोही अवधिमा १० अर्ब ९२ करोड ४० लाख रुपैयाँ बराबर १० करोड १० लाख २९ हजार ६ सय १४ किलो दलहन आयात भएका थिए, । यसरी परिमाणतर्फ ९६ लाख ६८ हजार ६ सय ५८ किलो तथा मूल्यतर्फ करिब १ अर्ब ८१ करोड रुपैयाँले कमी आएको छ। मूल्यका आधारमा आयात १७ प्रतिशतले घटेको हो।
सबैभन्दा धेरै मुसुरोको आयात घटेको छ। चालु आवमा ३ अर्ब ७३ करोड ४० लाख रुपैयाँ बराबरको ४ करोड १२ लाख किलो मुसुरो आयात भएको छ। गत आवको सोही अवधिमा ४ अर्ब ८१ करोड रुपैयाँ बराबरको ४ करोड ८५ लाख किलो मुसुरो आयात भएको थियो। यसअनुसार मुसुरोको मूल्य २२ प्रतिशतले घटेको छ।
सिमी–राज्माको आयात पनि उल्लेख्य रूपमा घटेको छ।
गत वर्ष २ अर्ब ९२ करोड रुपैयाँ बराबरको २ करोड ३२ लाख किलो सिमी राज्मा आयात भएकोमा यस वर्ष २ अर्ब ३३ करोड रुपैयाँ बराबरको १ करोड ९१ लाख किलो सिमी राज्मा आयात भएको छ। जुन गत वर्षको तुलनामा २० प्रतिशत कम हो।
चनाको आयात परिमाणमा केही बढे पनि मूल्यमा चार प्रतिशतले घटेको छ। चालु आवमा २ अर्ब १८ करोड रुपैयाँको २ करोड ४२ लाख ७६ हजार ३ सय ३१ किलो चना आयात भएको छ। गत वर्ष २ अर्ब २८ करोड रुपैयाँ बराबरको २ करोड २७ लाख किलो चना आयात भएको थियो।
रहरको आयात मूल्य पाँच प्रतिशतले घटेको छ। चालु आवमा ३२ करोड २५ लाख रुपैयाँ बराबरको २८ लाख २८ हजार किलो रहर आयात हुँदा गत वर्ष ३५ करोड १८ लाख रुपैया बराबरको २७ लाख १६ हजार किलो रहर आयात भएको थियो।
अन्य गेडागुडीको आयातमा पनि १३ प्रतिशतले कमी आएको छ। यसको विपरीत केराउको आयात मूल्य १५० प्रतिशतले बढेको छ। गत वर्ष ३ करोड २६ लाख रुपैया बराबरको ३८ हजार किलो केराउ आयात भएको थियो । यस वर्ष ८ करोड ३९ लाख रुपैया बराबरको ३ लाख ६५ हजार किलो केराउ आयात भइसकेको छ ।
बकुल्लाको आयात पनि उल्लेख्य रूपमा बढेको छ।
गत वर्ष १७ हजार ७० हजार किलो आयात भएको बकुल्ला यस वर्ष ९३ हजार ८ सय ४० किलो आयात भएको छ। यसको मूल्य ५२५ प्रतिशतले वृद्धि भएको भन्सार तथ्यांकले देखाएको छ।
वीरगन्ज उद्योग वाणिज्य संघका अध्यक्ष हरि गौतम अन्तर्राष्ट्रिय बजारमा मूल्यको उतारचढाव, मागमा आएको परिवर्तन तथा वैकल्पिक खाद्यान्नको प्रयोग बढेकाले केही दलहनको आयातमा कमी आएको बताउँछन् । यद्यपि बजारको मागका आधारमा केराउ र बकुल्लाजस्ता दलहनको आयात भने बढिरहेको उनले बताए ।
