: महोत्तरीको बर्दिबास नगरपालिका–१२, बिजलपुरा चल्कीका एक ८ वर्षीय बालकको विषालु सर्पको टोकाइबाट मृत्यु भएको छ। स्थानीय चन्दन कापरका ८ वर्षीय छोरा विवेक कापरको उपचारका क्रममा बिहीबार बिहान बर्दिबास जनसेवा अस्पतालमा मृत्यु भएको वडा सदस्य रुपो देवी सदाले जानकारी दिइन्।
बालककी आमा अमृतदेवी कापरका अनुसार बुधबार साँझ घरमै अम्बा टिप्ने क्रममा विवेकलाई विषालु सर्पले टोकेको थियो। सर्पदंशपछि तत्काल उपचारका लागि बर्दिबास जनसेवा अस्पताल लगिएको भएपनि भेन्टिलेटरमा उपचारकै क्रममा उनको ज्यान गएको हो।
पीडित परिवारका अनुसार उपचारमा करिब ७० हजार रुपैयाँ खर्च भएको छ। आर्थिक अवस्था अत्यन्त कमजोर भएकाले उक्त रकम तिर्न नसक्दा अस्पतालले शव जिम्मा दिन नसकेको परिवारको गुनासो छ।
यस विषयमा बर्दिबास जनसेवा अस्पतालका सञ्चालक सुमन भुजेलले अस्पतालले मानवीय आधारमा उपचार खर्चमा १५ प्रतिशत छुट दिएको र थप सहजीकरणका लागि आवश्यक पहल भइरहेको बताए।
घटनापछि स्थानीयवासीले विपन्न परिवारलाई राहत तथा उपचार खर्च व्यवस्थापनमा सम्बन्धित निकायले सहयोग गर्नुपर्ने माग गरेका छन्।
