: हुथी विद्रोहीहरूले साउदी अरबका बन्दरगाह प्रयोग गर्ने तेल ट्यांकरहरू आक्रमणलाई चेतावनी दिएका छन् । अघिल्लो दिन घोषणा गरिएको नाकाबन्दी कार्यान्वयन गर्न हुथीहरूले तीव्र कदम चालेका छन् ।
लाल सागरमा आएको यो हुथी चेतावनी र अरब प्रायद्वीपको अर्को छेउमा रहेको खाडी क्षेत्रमा इरानले दिएको समुद्री यातायात अवरोध गर्ने धम्कीले लामो समयदेखि जारी द्वन्द्वलाई अझ गम्भीर बनाउने आशंका बढेको छ । यसले हालसम्म ठूलो असर नपरेको साउदी अरबको तेल निर्यातलाई प्रभावित पार्न सक्ने र क्षेत्रीय संकट झन् चर्किन सक्ने देखिएको छ ।
हुथीहरूको धम्कीलाई गम्भीर रूपमा लिइएको संकेत गर्दै, चीन र भारतका लागि साउदी कच्चा तेल बोकेर गएका तीन वटा तेल ट्यांकरले मंगलबार आफ्नो बाटो परिवर्तन गरेका छन् । ती जहाजहरू लाल सागरको मुखमा रहेको हुथी नियन्त्रण क्षेत्रबाट टाढिँदै स्वेज नहरतर्फ मोडिएका छन् । हुथीहरूले भने ६ वटा जहाजले आफ्नो मार्ग परिवर्तन गरेको दाबी गरेका छन् ।
अमेरिकी राष्ट्रपति डोनाल्ड ट्रम्पले मंगलबार हुथीहरूले आफ्नो धम्की कार्यान्वयन गरेमा अमेरिकाले ‘आफ्नो काम गर्नुपर्ने’ बताएका छन् । उनले लेबनानका राष्ट्रपति जोसेफ आउनसँग ह्वाइट हाउसमा भएको भेटमा भने, ‘हामीले यसअघि पनि हुथीहरूसँग त्यस्तै गरेका थियौं र त्यसपछि केही समय उनीहरूबाट कुनै गतिविधि सुनिएन ।’
यो धम्की कूटनीतिज्ञहरूले इरान र अमेरिकाबीच भत्किएको अस्थायी सम्झौता पुनःस्थापित गर्ने प्रयास गरिरहेका बेला आएको हो । उता दुवै देशले पुनः सुरु भएको युद्धको १०औं दिनमा पनि आक्रमण जारी राखेका छन् । हुथीहरूले यमनको उत्तरी भागसहित लाल सागरको दक्षिणी प्रवेशद्वार बाब अल–मन्देब जलडमरूमध्य क्षेत्र नियन्त्रण गर्छन् ।
उनीहरूले औपचारिक रूपमा समुद्री मार्ग बन्द गर्ने घोषणा नगरे पनि साउदी बन्दरगाह प्रयोग गर्ने जहाजलाई लक्षित गर्ने धम्कीले विश्वव्यापी समुद्री व्यापारमा चिन्ता बढाएको छ । यो मार्गबाट विश्वको करिब ७ प्रतिशत समुद्री व्यापार हुने गर्छ । हुथीहरूले सोमबार विभिन्न जहाज कम्पनीहरूलाई इमेल पठाउँदै साउदी अरबका बन्दरगाहमा सामान लोड वा अनलोड नगर्न चेतावनी दिएका छन् । उनीहरूले यस्तो गतिविधि गरेमा आफ्नो पहुँचभित्र पर्ने ‘जुनसुकै स्थानमा’ जहाजलाई निशाना बनाउन सकिने बताएका छन् ।
