: फ्रान्सको दक्षिण-पश्चिमी सहर बोर्दो नजिकै फैलिएको विनाशकारी जङ्गलको डढेलो नियन्त्रणबाहिर पुगेको छ।डढेलो बोर्दो सहरभन्दा १५ किलोमिटर मात्र टाढा पुगेपछि प्रभावित क्षेत्र गिरोन्दको निरीक्षण गर्दै राष्ट्रपति इम्यानुएल म्याक्रोनले यसलाई दोस्रो विश्वयुद्धपछिकै ‘अभूतपूर्व र भीषण संकट’ को संज्ञा दिएका छन्।
डढेलोको जोखिम बढेसँगै फ्रान्समा हालसम्म २ लाख २० हजारभन्दा बढी सर्वसाधारणलाई सुरक्षित स्थानमा सारिएको छ। स्थिति झनै प्रतिकूल बन्न सक्ने भन्दै बोर्दोका मेयर थोमस काजेनाभले सम्भावित सबै परिस्थितिका लागि तयारी पुरा गरिएको बताएका छन्। थप स्थानान्तरणको आदेश आएमा ठूलो सङ्ख्यामा मानिसहरूलाई राख्ने व्यवस्थापन मिलाइएको उनले जानकारी दिए।
यस्तै, फ्रान्सका गृहमन्त्री लरेन्ट न्युनेजले डढेलो तीव्र गतिमा फैलिरहेकाले नियन्त्रणमा लिन निकै कठिन भइरहेको बताएका छन्। मंगलबारदेखि पुनः अत्यधिक गर्मीको लहर (हिटवेभ) चल्ने पूर्वानुमान गरिएकाले डढेलो नियन्त्रण अभियान थप जटिल बन्ने जोखिम छ।
यता छिमेकी मुलुक स्पेनको म्याड्रिड पश्चिम क्षेत्रमा पनि डढेलो नियन्त्रणबाहिर जाँदा १ लाखभन्दा बढी मानिस विस्थापित भएका छन्। दुवै देशमा गरी हालसम्म ३ लाख २० हजारभन्दा बढी मानिस सुरक्षित स्थानमा शरण लिन बाध्य भएका छन्।
