— नेपाल कम्युनिस्ट पार्टी (नेकपा)का केन्द्रीय कार्यसमन्वय समिति सदस्य तथा बागमती प्रदेशका मुख्यमन्त्रीका दाबेदार गंगानारायण श्रेष्ठले प्रदेश सरकारको नेतृत्व बाँडफाँटप्रति असन्तुष्टि जनाएका छन्।
बागमती प्रदेशसभामा सबैभन्दा ठूलो दलको हैसियतमा रहेको नेकपाको भागमा मुख्यमन्त्री नपरेपछि श्रेष्ठले सामाजिक सञ्जालमार्फत पार्टी संयोजक प्रचण्डसँग नेतृत्व बाँडफाँटको आधारबारे स्पष्ट पार्न माग गरेका हुन्।
'प्रदेश सरकारको नेतृत्व कुन आधारमा बाँडफाँट गरियो? त्यसको जवाफ नेतृत्वले जनतालाई दिनैपर्छ,’ उनले सामाजिक सञ्जालमा लेखेका छन्।
श्रेष्ठले वर्तमान अवस्थामा कम्युनिस्ट आन्दोलन कमजोर बनेको उल्लेख गर्दै रूपान्तरणसहित कम्युनिस्ट शक्तिहरू एकतामा पुग्न एमालेसँग मिलेर प्रदेश सरकार गठन गर्नु उपयुक्त हुने धारणा पनि व्यक्त गरेका छन्। तर, सरकार गठनको भागबन्डा स्पष्ट, वैज्ञानिक र वस्तुगत आधारमा हुनुपर्ने उनको जोड छ।
उनले आफ्नो दाबी सुरुदेखि नै मुख्यमन्त्री पदका लागि रहेको स्पष्ट पार्दै मन्त्री बन्ने विषयमा आफूले कुनै दाबी नगरेको बताएका छन्। 'मेरो दाबी सुरुदेखि अहिलेसम्म मुख्यमन्त्रीमा थियो। एकथान मन्त्रीको लागि मेरो कुनै दाबी छैन,' उनले उल्लेख गरेका छन्।
