— ‘जोकर’, ‘गोस्टबस्टर्सः आफ्टरलाइफ’ लगायत दर्जनौं फिल्ममा लगानी गरेका जेसन क्लोथविरुद्ध १० करोड अमेरिकी डलर बराबरको पोन्जी स्कीम (ठगी धन्दा) चलाएको अभियोगमा संघीय ग्रान्ड जुरीद्वारा विद्युतीय ठगीको मुद्दा दर्ता गरिएको छ ।
६० वर्षीय क्लोथविरुद्ध मंगलबार सिकागोस्थित अमेरिकी जिल्ला अदालतमा अभियोगपत्र दर्ता गरिएको हो । उनलाई सोही दिन लस एन्जलसबाट पक्राउ गरी पहिलोपटक अदालतमा उपस्थित गराइएको उत्तरी इलिनोयका लागि अमेरिकी सरकारी वकिलको कार्यालयले जनाएको छ ।
अदालतको अभियोगपत्र अनुसार, क्लोथले फिल्म वा भिडियो गेम प्लेटफर्ममा प्रयोग गर्ने भन्दै लगानीकर्ताहरूबाट मोटो रकम उठाएका थिए । तर, उक्त रकम फिल्ममा लगाउनुको सट्टा क्यानाडाको घरजग्गा कारोबार (रियल स्टेट) र पुराना लगानीकर्ताहरूको रकम फिर्ता गर्नमा प्रयोग गरिएको आरोप लगाइएको छ ।
क्लोथले यस आपराधिक मुद्दाका लागि कुनै वकिल राखे, नराखेको बारेमा स्पष्ट खुलेको छैन । फ्लोरिडा र क्यालिफोर्नियामा चलिरहेका अन्य मुद्दाहरूमा उनको प्रतिनिधित्व गरिरहेका केही वकिलहरूसँग प्रतिक्रिया माग्दा कुनै जवाफ दिन मानेका छैनन् । अभियोगपत्रमा जनाइए अनुसार, क्लोथले क्यानाडामा क्रिएटिभ वेल्थ मिडिया फाइनान्स कर्पोरेसन नामको कम्पनी सञ्चालन गर्दै आएका थिए ।
उनले सन् २०१९ देखि विभिन्न ग्राहकलाई फिल्म तथा मनोरञ्जनका आयोजनाहरूमा लगानी गर्न प्रोत्साहन गरेका थिए । इलिनोयका एक लगानी सल्लाहकार, उनका ग्राहकहरू र अन्य व्यक्तिहरूबाट क्लोथले १० करोड डलरभन्दा बढी रकम उठाएको र लगानीको मूल्यबारे उनीहरूसँग ढाँटेको अभियोग लगाइएको छ ।
उनीमाथि विद्युतीय ठगीका सातवटा मुद्दा दर्ता गरिएका छन्, जसमा प्रत्येक मुद्दामा २० वर्षसम्मको कैद सजाय हुन सक्छ । यसका साथै उनीबाट १ करोड २० लाख डलरभन्दा बढी रकम जफत (फर्फिट) गर्न माग गरिएको छ । एफबीआईले आफू पीडित भएको शंका लागेका व्यक्तिहरूलाई अनलाइन फारम भरेर सिकागोस्थित आफ्नो कार्यालयमा सम्पर्क गर्न आग्रह गरेको छ ।
निर्माता क्लोथमाथि आर्थिक अनियमितताको आरोप लागेको यो पहिलोपटक भने होइन । पछिल्ला वर्षहरूमा उनीमाथि लगानीकर्ताहरूद्वारा धेरै मुद्दाहरू हालिएका छन् । जसमा सिकागोमा परेको फिल्मसम्बन्धि आर्थिक ठगीसम्बन्धी सामूहिक मुद्दा, फ्लोरिडाका एक लगानीकर्ताले सम्झौता उल्लंघन गरेको भन्दै हालेको मुद्दा र न्युयोर्कका लगानीकर्ताहरूले हालेको (पछि खारेज भएको) मुद्दा समावेश छन् । सिकागो र फ्लोरिडाका मुद्दाहरूमा क्लोथले कानुनी लडाइँ लडिरहेका छन् र ती मुद्दाहरू अझै विचाराधीन नै छन् ।
गत वर्ष, ओन्टारियो सेक्युरिटिज कमिसनले पनि क्लोथ र उनको कम्पनीविरुद्ध इलिनोयको अभियोगपत्रसँग मिल्दोजुल्दो आरोपमा कानुनी कारबाही सुरु गरेको थियो । कमिसनका अनुसार क्लोथ र उनको कम्पनीले विभिन्न फिल्म तथा टेलिभिजन कार्यक्रमका लागि लगानीकर्ताबाट ५० करोड डलरभन्दा बढी उठाएका थिए र त्यसमध्ये ७ करोड डलर पुराना लगानीकर्तालाई रकम फिर्ता गर्नेजस्ता अन्य काममा प्रयोग गरेका थिए । उक्त मुद्दा पनि हाल विचाराधीन नै छ ।
