— सवारी चालक अनुमतिपत्र (लाइसेन्स) का लागि स्वास्थ्य परीक्षण गर्ने क्लिनिकहरूको सेवा प्रवाहमा अवरोध नगर्न सरकारका नाममा सर्वोच्च अदालतले अन्तरिम आदेश जारी गरेको छ ।
सुनौलो मेडिकल क्लिनिकका सञ्चालक कालीबहादुर थापासमेतले दायर गरेको रिटमा सुनुवाइ गर्दै न्यायाधीश मेघराज पोखरेलको एकल इजलासले यस्तो आदेश गरेको हो ।
मन्त्रीस्तरीय बैठकले सबै स्वास्थ्य संस्थाका लागि स्वास्थ्य परीक्षण खुला गरेको थियो । तर त्यसविरुद्ध व्यवसायीले सर्वोच्चमा हालेको रिटमा अन्तरिम आदेश जारी भएको यातायात व्यवस्था विभागका निर्देशक एवं सूचना अधिकारी केशव खतिवडाले जनाए । सर्वोच्चको यो आदेशले अर्को निर्णय नआएसम्म उक्त निर्णय रोकिएको खतिवडाको भनाइ छ ।
‘१३ जेठको निर्णय तथा ३२ असारको पत्रसमेत प्रस्तुत रिट निवेदनको अन्तिम किनारा नहुँदासम्म कार्यान्वयन नगरी यथास्थितिमा राख्नू, साथै निवेदकहरूको युजर र पासवर्डसमेतका निवेदकको उल्लिखित सेवा सञ्चालनमा कुनै बाधा अवरोध नगर्नू/नगराउनू,’ सर्वोच्चको आदेशमा भनिएको छ ।
भौतिक पूर्वाधार तथा यातायात मन्त्रालय र यातायात व्यवस्था विभागको पछिल्लो निर्णय कार्यान्वयनमा रोक लगाउँदै साबिककै व्यवस्थाअनुसार सेवा निरन्तर गर्न पनि सर्वोच्चले भनेको छ । निवेदक क्लिनिकहरूले बागमती प्रदेशको ‘सवारी चालक अनुमतिपत्रको सेवा प्रवाह गर्नेसम्बन्धी कार्यविधि निर्देशिका, २०८०’ बमोजिम छनोट भई सम्झौता गरेर स्वास्थ्य परीक्षणको सेवा दिँदै आएका थिए ।
तर संघीय सरकारको भौतिक पूर्वाधार तथा यातायात मन्त्रालयले गत १३ जेठ र १३ असारमा पत्र लेख्दै नेपाल मेडिकल काउन्सिलमा दर्ता भएका सबै चिकित्सकले गर्ने स्वास्थ्य परीक्षणलाई मान्यता दिने र सबै क्लिनिकका लागि सेवा खुला गर्ने आशयको निर्णय गरेको थियो । यस निर्णयले पहिलेदेखि सम्झौता गरेर लगानी गरेका क्लिनिकको व्यवसायमा प्रतिकूल असर पर्ने र उनीहरूको ‘युजर र पासवर्ड’ समेत बन्द गरिने अवस्था आएपछि क्लिनिक सञ्चालक अदालत पुगेका थिए ।
सर्वोच्च अदालतले आफ्नो आदेशमा निवेदकहरूले प्रदेश कानुन र निर्देशिकाबमोजिम सम्झौता गरी सेवा दिइरहेको अवस्थामा उनीहरूलाई विस्थापित गर्ने गरी भएको मन्त्रालयको निर्णयले संविधानको धारा १७ (२) (छ) ले दिएको ‘पेसा, रोजगार, उद्योग र व्यापार गर्ने’ मौलिक हकमा आघात पुग्ने ठहर गरेको छ ।
यो आदेशसँगै हाललाई ड्राइभिङ लाइसेन्सका लागि स्वास्थ्य परीक्षण गर्दै आएका सूचीकृत क्लिनिकको सेवा यथावत् रहने निश्चित भएको छ ।
