— अख्तियार दुरुपयोग अनुसन्धान आयोगले भूमि प्रशासन कार्यालय, लगनखेलका तीन नायब सुब्बासहित पाँच जनालाई ३ लाख रुपैयाँ घुससहित नियन्त्रणमा लिएको छ।
आयोगका अनुसार भूमि प्रशासन कार्यालय, लगनखेल, ललितपुरका नायब सुब्बा उत्तम कुँवर, विशाल सुन्दास र राजकुमार मगर तथा लेखापढी व्यवसायी शैलेन्द्र रानामगर र समिर कटवालले मिलेमतोमा जग्गाको बकसपत्र गराइदिने काममा सेवाग्राहीलाई दुःख–हैरानी दिई घुस मागेको भन्ने सूचना तथा उजुरीका आधारमा उनीहरूलाई नियन्त्रणमा लिइएको हो।
आयोगको टोलीले सेवाग्राहीबाट घुसस्वरूप ३ लाख रुपैयाँ लिइसकेको अवस्थामा ललितपुर महानगरपालिका–४ स्थित एक होटलबाट उनीहरूलाई नियन्त्रणमा लिएको जनाएको छ। उनीहरूको साथबाट स्रोत नखुलेको थप २४ हजार ८९० रुपैयाँ पनि बरामद भएको आयोगले जनाएको छ।
घटना सम्बन्धमा थप अनुसन्धान भइरहेको आयोगका प्रवक्ता सुरेश न्यौपानेले जारी गरेको विज्ञप्तिमा उल्लेख छ।
