: दक्षिण एसियाली राष्ट्रहरुबीच हुने साफ च्याम्पियनसिप फुटबलको तालिका निर्धारण भएको छ । भुटानमा भएको ‘ड्र’ मा नेपाल बाहेक दक्षिण एसियाका ६ देशको समूह विभाजन भएको हो । साफका अनुसार यदि सेप्टेम्बर ३० सम्ममा नेपालको फिफा प्रतिबन्ध खुलेको खण्डमा नेपालले आयोजक राष्ट्र बंगलादेशको समूह ‘ए’ मा रहेर साफ खेल्ने सम्भावना रहेको छ ।
‘ड्र’ सुरु हुनु अगाडि नै साफले नेपालको सहभागिताको बारेमा जानकारी दिएको थियो । समूह ‘ए’ मा आयोजक राष्ट्र बंगलादेशसँग श्रीलंका र भुटानले प्रतिस्पर्धा गर्नेछन् । समूह ‘बी’ मा भारत, पाकिस्तान र माल्दिभ्सले खेल्ने छन् । यदि ६ टिम भएको खण्डमा प्रतियोगितामा ९ खेल हुनेछ ।
जसमा लिग कम नकआउट प्रणालीमा खेल हुँदा हरेक टिमका शीर्ष २ टोलीले सेमिफाइनलमा स्थान बनाउने छन् । यदि नेपालले सहभागिता जनाएको खण्डमा १२ खेल हुनेछन् । जसमा ९ वटा लिगको खेल हुनेछ भने २ सेमिफाइनल र १ फाइनल हुनेछ । प्रतियोगिता नोभेम्बर ४ देखि १७ सम्म बंगलादेशको ढाकामा सञ्चालन हुनेछ । साफ च्याम्पियनसिपको १४ वटा संस्करण सम्पन्न हुँदा नेपाल १ पटक मात्र फाइनल पुगेको छ ।
नेपाल सन् २०२१ मा फाइनल प्रवेश गरेको थियो । नेपालले सन् २०२१ बाहेक १४ संस्करणमा ६ पटक सेमिफाइनलसम्म स्थान बनाएको छ । सन् १९९३, १९९५, १९९९, २०११, २०१३ र २०१८ मा नेपालले सेमिफाइनलसम्म स्थान बनाएको थियो । प्रतियोगिताको समय नजिकिँदै गर्दा नेपालका फुटबल खेलाडी तथा प्रशिक्षकले सम्बन्धित निकायलाई फिफाको प्रतिबन्ध खुलाउन आग्रह गर्दै सामाजिक सञ्जालमा स्ट्याटस र लेखहरु राखिरहेका छन् ।
