: अमेरिकी सरकारले मध्यपूर्वमा रहेका आफ्ना नागरिकलाई सतर्क रहन तथा क्षेत्रीय तनाव थप बढेमा त्यहाँबाट तत्काल बाहिरिन तयार रहन आग्रह गरेको छ । अमेरिकी सञ्चारमाध्यमहरूले राष्ट्रपति डोनाल्ड ट्रम्पले सप्ताहन्तमा इरानमाथि थप शक्तिशाली आक्रमण गर्न सक्ने योजना बनाइरहेको दाबी गरिरहेका बेला यो अपिल आएको हो ।
आफ्नो सुरक्षा चेतावनीमा अमेरिकी विदेश मन्त्रालयले मध्यपूर्व बाहिर रहेका अमेरिकी कूटनीतिक कार्यालयहरू तथा अन्य अमेरिकी प्रतिष्ठानहरू पनि विगतमा निशाना बनेको उल्लेख गरेको छ । विदेश मन्त्रालयका अनुसार इरान र उसले समर्थन गर्ने समूहहरूले विश्वभर रहेका अमेरिका, अमेरिकी नागरिक वा अमेरिकी हितसँग सम्बन्धित स्थानहरूलाई निशाना बनाउन सक्ने जोखिम रहेको छ ।
यसअघि इरानले अमेरिकामाथि तनाव बढाएको आरोप लगाउँदै, आफूविरुद्ध सहयोग गर्ने कुनै पनि क्षेत्रीय देश ‘युद्धको आगोमा फस्ने’ चेतावनी दिएको थियो । शनिबार जारी गरिएको अमेरिकी सुरक्षा सूचनामा मध्यपूर्वमा रहेका अमेरिकी नागरिकलाई अत्यधिक सतर्क रहन, उडान रद्द हुन सक्ने, हवाई क्षेत्र समय–समयमा बन्द हुन सक्ने तथा यात्रामा अवरोध आउन सक्ने सम्भावनाका लागि तयार रहन भनिएको छ ।
अमेरिका र इजरायलको सम्भावित योजना
अमेरिकी चेतावनीमा भनिएको छ कि मध्यपूर्वमा रहेका अमेरिकी नागरिकले सम्भव भएमा त्यहाँबाट बाहिरिनेबारे विचार गर्नुपर्छ वा तनाव बढेमा तुरुन्त प्रस्थान गर्न तयार रहनु पर्छ । साथै मध्यपूर्व बाहिर रहेका अमेरिकी नागरिकलाई पनि उक्त क्षेत्रमा यात्रा गर्ने वा त्यहाँ हुँदै यात्रा गर्ने निर्णय पुनर्विचार गर्न आग्रह गरिएको छ ।
बहराइन, इराक, इजरायल, जोर्डन, कुवेत, लेबनान, ओमान, कतार, साउदी अरेबिया र संयुक्त अरब इमिरेट्सस्थित अमेरिकी दूतावासहरूले पनि यही सुरक्षा चेतावनी पुनः जारी गर्दै ‘अचानक तनाव बढ्न सक्ने’ सम्भावनाबारे सचेत गराएका छन् । यसअघि अमेरिकी सञ्चारमाध्यमहरूले सरकारी अधिकारीहरूलाई उद्धृत गर्दै राष्ट्रपति ट्रम्पले यही सप्ताहन्त इरानमाथि नयाँ आक्रमणको आदेश दिन सक्ने बताएका थिए । रिपोर्टका अनुसार अमेरिका र इजरायलले इरानको ऊर्जा पूर्वाधारलाई लक्षित गर्दै हालसम्मकै सबैभन्दा ठूलो बमबारी अभियानमध्ये एक सञ्चालन गर्ने योजना बनाएका थिए । अमेरिका र इजरायलले फेब्रुअरी २८ देखि इरानविरुद्ध सैन्य कारबाही सुरु गरेका थिए ।
