। थाइल्यान्डबाट आएको साढे पाँच किलो गाँजासहित दुई भारतीय नागरिक पक्राउ परेका छन् । नेपाल प्रहरीको लागुऔषध नियन्त्रण ब्युरोले बुधबार काठमाडौंको नयाँ बसपार्कबाट ती दुई जनालाई पक्राउ गरेको जनाएको छ ।
पक्राउ पर्नेमा भारतको उत्तर प्रदेश लुधियानाका ४३ वर्षीय रिंकु मेहेन र उत्तर प्रदेश जोयाका ३२ वर्षीय मोहम्मद हसनैन रहेको प्रहरीले जनाएको छ ।
प्रहरीका अनुसार ब्युरोको टोली लागुऔषध कारोबार हुनसक्ने उच्च जोखिमको क्षेत्र नयाँ बसपार्कमा पुगेका बेला ती दुई जना फेला परेका थिए ।
सुटकेस लिएर उभिरहेको अवस्थामा उनीहरूमाथि शंका लागेको प्रहरीले जनाएको छ । त्यसपछि जाँच गर्दा रिंकु मेहेनले बोकेको सुटकेसबाट पाँच किलो गाँजा फेला परेको थियो ।
त्यसपछि दुवैजनालाई पक्राउ गरेर सोधपुछ गर्दा उनीहरूसहित तीन जना थाइल्यान्डबाट आएको गाँजा रिसिभ गर्न लुधियानाबाट यूपी ३८एपी १९७५ नम्बरको गाडीमा काठमाडौं आएको खुलेको ब्युरोका प्रवक्ता एसपी दुर्गाराज रेग्मीले जानकारी दिए ।
खोजी गर्दैजाँदा उक्त गाडी धादिङको धुनिबेँशी नगरपालिका–९ कानाकोटमा बेवारिसे अवस्थामा फेला परेको प्रहरीले जनाएको छ ।
सो गाडीमा थप ५०० ग्राम गाँजा बरामद भएको एसपी रेग्मीले जानकारी दिए ।
प्रहरीले थाइल्यान्डबाट गाँजा पठाउन सहुलत खान र अर्का फरार रहेका साहादत खान दाजुभाइ रहेको खुल्न आएको जनाएको छ ।
यस्तै, उक्त गाडी यसअघि दुई पटक नेपाल आएर थाइल्यान्डबाट आएको गाँजा भारत लगेर गइसकेको पनि खुलेको प्रहरीले जनाएको छ ।
