: नेपाली कांग्रेसको आन्तरिक विवादमा निर्वाचन आयोगको निर्णय सदर गर्ने सर्वोच्च अदालतको फैसला पुनरावलोकनको माग गर्दै शेरबहादुर देउवा पक्षले दिएको निवेदनमा बिहिबार अध्ययन हुने भएको छ।
उक्त निवेदनमाथि अध्ययनका लागि न्यायाधीश मनोजकुमार शर्मा,नित्यानन्द पाण्डेय र श्रीकान्त पौडेलको संयुक्त इजलास गठन भएको छ। इजलासले उक्त निर्णयमा पुनरावलोकनका लागि अनुमति (निस्सा) दिने वा नदिने विषयमा निर्णय गर्नेछ।
इजलासले पुनरावलोकनको निस्सा दिएमा मुद्दाको सुनुवाइ प्रक्रिया अगाडि बढ्नेछ। तर,अनुमति नदिए यसअघिको निर्णय नै अन्तिम हुनेछ।
यसअघि न्यायाधीश शारंगा सुवेदी र नृपध्वज निरौलाको इजलासले वैशाख ४ गते देउवा पक्षले दायर गरेको रिट खारेज गर्दै विशेष महाधिवेशनबाट निर्वाचित सभापति गगन कुमार थापाको कार्यसमितिलाई मान्यता दिने निर्वाचन आयोगको निर्णयलाई सदर गरेको थियो।
