: युगान्डाका चर्चित फुटबलर डेभिड ओवोरीको निधन भएको छ । मंगलबार संदिग्ध लुटेराहरूले ओवोरीमाथि आक्रमण गरेको स्थानीय प्रहरीले जनाएको छ । लुटपाटको विरोध गर्ने क्रममा उनीमाथि आक्रमण भएपछि उनी बेहोस भएका थिए ।
आक्रमणपछि ओवोरीलाई सुरुमा नजिकैको क्लिनिकमा लगिएको थियो । त्यसपछि उनलाई सहरकै एक निजी अस्पतालमा रिफर गरिएको थियो । तर उपचारकै क्रममा बुधबार उनको निधन भयो । प्रत्यक्षदर्शीहरूका अनुसार, आक्रमणकारीहरूको समूहले ओवोरीमाथि ढुंगाले प्रहार गरी गम्भीर घाइते बनाएको थियो । त्यसपछि उनीहरू सामान लुटेर घटनास्थलबाट फरार भएका थिए । आक्रमणपछि ओवोरी बेहोस अवस्थामा फेला परेका थिए ।
यस घटनापछि युगान्डाभर शोकको लहर छाएको छ । बढ्दो हिंसात्मक अपराधप्रति सर्वसाधारणले आक्रोश समेत व्यक्त गरेका छन् । २७ वर्षीय डेभिड ओवोरी युगान्डा प्रिमियर लिगका सफल क्लब एससी भिल्लाका कप्तान थिए । उनी टोलीका लागि राइट–ब्याक र मिडफिल्डरको भूमिकामा खेल्थे । उनले युगान्डाको राष्ट्रिय फुटबल टोली ‘क्रेन्स’ को समेत प्रतिनिधित्व गरेका थिए । एससी भिल्लाले जारी गरेको श्रद्धाञ्जली सन्देशमा भनिएको छ, ‘हामीले केवल एक खेलाडी मात्र होइन, एक नेता, एक दाजुभाइ र एक साथी पनि गुमाएका छौं ।’
