: १२८ मेगावाट क्षमताको तमोर–मेवा जलविद्युत् आयोजनाको सुरुङ निर्माण कार्य औपचारिक रूपमा सुरु भएको छ । आयोजना प्रवद्र्धक स्पार्क हाइड्रोइलेक्ट्रिक कम्पनी लिमिटेडले बुधबार सुरुङको ब्लास्टिङ गर्दै कार्यको शुभारम्भ गरेको हो । कम्पनीका संस्थापक सञ्चालक भानेन्द्रकुमार लिम्बूका अनुसार सुरुङ ब्लास्टिङसँगै आयोजना निर्माणको चरणमा प्रवेश गरेको छ ।
निर्माण कार्यतालिका अनुसार सुरुङ निर्माणलाई आयोजनाको सबैभन्दा महत्वपूर्ण चरणमध्ये एक मानिएको छ । फुङ्लिङमा आयोजित कार्यक्रममा कम्पनीका अध्यक्ष तथा प्रबन्ध निर्देशक सुदीपकुमार चौधरी, सञ्चालक समितिका पदाधिकारी तथा स्थानीय जनप्रतिनिधिको उपस्थिति रहेको थियो । कम्पनीका अनुसार यो आयोजना २०८५ साल असोज २५ गते सम्पन्न गर्ने गरी काम गरिने छ ।
सञ्चालक सदस्य लिम्बूले हालसम्म आयोजनाका लागि आवश्यक क्याम्प निमार्ण, जग्गा खरिद प्रक्रिया तथा सडक सञ्जाल निमार्णको कामसहित करिब ३० प्रतिशत काम सम्पन्न भएको बताए । वित्तीय व्यवस्थापनमा सिद्धार्थ बैंक लिमिटेडले प्रमुख (लिड) बैंकको भूमिका निर्वाह गरिरहेको छ भने माछापुच्छ्रे बैंक लिमिटेड सह–प्रमुख (को–लिड) बैंकका रूपमा सहभागी रहेको कम्पनीले जनाएको छ । आयोजनाको लागि २३ अर्ब रुपैयाँ बढी खर्च हुने बताइएको छ ।
