: नेपाल शिक्षक महासंघले सरकारसँग भएका सहमति कार्यान्वयन नभएको र विद्यालय शिक्षासम्बन्धी विभिन्न माग पूरा नभएको भन्दै आगामी भदौदेखि देशव्यापी आन्दोलन गर्ने घोषणा गरेको छ।
महासंघको तेस्रो राष्ट्रिय परिषद्को बैठकले शुक्रबार सार्वजनिक गरेको निर्णयअनुसार विद्यालय शिक्षा ऐन शीघ्र जारी गर्न, शिक्षामा लगानी बढाउन, शिक्षक-कर्मचारीका सेवा-सुविधा र पेशागत अधिकार सुनिश्चित गर्न तथा विगतमा सरकारसँग भएका सहमति कार्यान्वयन गराउन आन्दोलन गर्ने निर्णय गरेको हो। आन्दोलनको मिति र कार्यक्रम भने विस्तारित कार्यालय बैठकले तय गर्ने महासंघले जनाएको छ।
महासंघले विद्यालय व्यवस्थापन समितिको अधिकार कटौती नगर्न, प्रधानाध्यापकलाई बलियो प्रशासनिक तथा प्राज्ञिक नेतृत्वको भूमिका दिन, संस्थागत विद्यालयका शिक्षक-कर्मचारीको पेशागत सुरक्षा र उचित सेवा-सुविधा सुनिश्चित गर्न तथा ट्रेड युनियन अधिकारको संरक्षण गर्न सरकारसँग माग गरेको छ।
त्यस्तै सरकारले गत वैशाख १७ गते गरेको शिक्षकका लागि दुर्गम (स्थानीय) भत्ता उपलब्ध गराउने निर्णय तत्काल कार्यान्वयन गर्न, प्रारम्भिक बालकक्षा शिक्षक, विद्यालय कर्मचारी र सिकाइ अनुदानका शिक्षकका लागि दरबन्दी सिर्जना गरी स्थायी शिक्षकसरह तलब-भत्ताको व्यवस्था गर्न पनि महासंघले माग गरेको छ।
