: इरानले ओमानसँग स्ट्रेट अफ हर्मुजको नियन्त्रणसम्बन्धी सम्झौता अन्तिम चरणमा पुगेको तर यसले मात्र जलमार्ग खुला गर्न पर्याप्त नहुने बताएको छ। यसैबीच संयुक्त अरब इमिरेट्स (युएई) ले इरानले सो जलक्षेत्रमा अर्को जहाजमाथि मिसाइल प्रहार गरेको जनाएको छ।
इरान र ओमानबीच हर्मुज जलडमरूमध्यबारे हुने सम्झौतालाई युद्ध अन्त्य गर्ने व्यापक प्रयासको महत्त्वपूर्ण खुड्किलोका रूपमा हेरिएको छ। गत फेब्रुअरी २८ देखि अमेरिका र इजरायलले इरानमाथि गरेको आक्रमणपछि सुरु भएको यस युद्धका कारण इरानले प्रमुख ऊर्जा निर्यात मार्गमा नियन्त्रण कायम गर्दै आएको छ।
ओमानले जहाजहरूमाथि भएका लगातारका आक्रमणहरूको भर्त्सना गर्दै इरानसँगको वार्ता 'सकारात्मक र रचनात्मक' रहेको जनाएको छ। ओमानको परराष्ट्र मन्त्रालयले सबै पक्षको हितलाई ध्यानमा राखी वार्तामा प्रभाव पार्ने कुनै पनि कार्य नगर्न आग्रह गरेको छ।
इरानी विदेशमन्त्री अब्बास अरागचीले ओमानसँग नयाँ समुद्री मार्गबारे सहमति 'निकै नजिक' पुगेको बताएका छन् । तर जलमार्ग पूर्ण रूपमा खुला गर्न अमेरिकाले इरानलाई क्षतिपूर्ति दिनुपर्ने लगायतका शर्तहरू पूरा हुनुपर्ने उनको भनाइ छ ।
इरानको उच्च राष्ट्रिय सुरक्षा निकायका सचिव मोहम्मद बाकेर जोल्कादरले इरानमाथिका धम्की, नाकाबन्दी र प्रतिबन्ध अन्त्य हुनुपर्ने, फ्रिज गरिएका इरानी सम्पत्ति फुकुवा हुनुपर्ने र लेबनान, प्यालेस्टाइन, यमन तथा इराकस्थित आफ्ना सहयोगीहरूमाथिको आक्रमण रोकिनुपर्ने माग राखेका छन्।
शनिबार युएईले आफ्नो राज्य सञ्चालित तेल कम्पनीसँग सम्बद्ध एक क्यारियरमाथि इरानले मिसाइल प्रहार गरेको जनाएको छ। यद्यपि, सो आक्रमणबाट कुनै मानवीय क्षति नभएको बताइएको छ। बेलायती समुद्री व्यापार अनुगमन निकायले पनि एक जहाजमा आगलागी भएको र पछि नियन्त्रणमा लिइएको पुष्टि गरेको छ।
अमेरिकी केन्द्रीय कमाण्डका अनुसार नाकाबन्दी सुरु भएयता मानवीय सहायता बोकेका ३० भन्दा बढी जहाजलाई आवतजावतको अनुमति दिइएको छ भने ५३ वटा जहाजलाई फर्काइएको छ।
इरानी क्रान्ति गार्ड्सले जलमार्ग खोल्ने विषय ओमानसँगको वार्तासँग नभई अमेरिकाले इरानका शर्तहरू स्वीकार गर्छ कि गर्दैन भन्ने कुरामा निर्भर रहने स्पष्ट पारेको छ।
