: इरानी अधिकारीहरूले होर्मुज जलडमरूमध्यसम्बन्धी ओमानसँगको अन्तिम सम्झौताबारे छलफल गरिरहेका छन् । तर उच्च अधिकारीहरूले रणनीतिक महत्वको उक्त जलमार्ग पूर्ण रूपमा पुनःखोल्ने विषय अमेरिकाबाट हुने सहुलियतमा निर्भर रहने बताएका छन् ।
इरानका विदेशमन्त्री अब्बास अराघ्चीले शनिबार ओमानसँगको सम्झौता ‘अन्तिम चरणमा पुगेको’ बताएका छन् । तर उनले जलडमरूमध्य पूर्ण रूपमा खोल्ने विषय अमेरिकाले जुनमा भएको समझदारीपत्र अन्तर्गत गरेका प्रतिबद्धता पालना गर्छ कि गर्दैन भन्ने कुरामा निर्भर रहने बताए । इरानका अनुसार अमेरिकाले यसअघि ती प्रतिबद्धता उल्लंघन गरिसकेको छ ।
इरानले यसअघि पनि अमेरिकाले तेहरानसँग समन्वय नगरी जलमार्गको दक्षिणी ओमानी मार्गलाई समर्थन गरेको, लेबनानमाथि इजरायलका आक्रमण रोक्न नसकेको तथा प्रतिबन्धका कारण विदेशमा रोक्का गरिएको इरानको रकम फुकुवा गर्न अस्वीकार गरेको भन्दै आलोचना गर्दै आएको छ ।
यसैबीच शनिबार इस्लामिक रिभोलुसनरी गार्ड कोप्र्सका प्रवक्ता होसेन मोहेब्बीले सरकारी सञ्चारमाध्यमसँग कुरा गर्दै होर्मुज जलडमरूमध्य पुनःखोल्ने विषयको ‘आफ्नै विशेष प्रक्रिया रहेको र यसको इरान–ओमान वार्तासँग कुनै सम्बन्ध नरहेको’ बताए ।
उनले जलडमरूमध्य पुनःखोल्न इरानले तोकेका ‘शर्तहरू’ स्वीकार गर्न अमेरिका बाध्य हुने दाबी गरे । मोहेब्बीका अनुसार गार्ड कोप्र्सले होर्मुजलाई केवल आर्थिक जलमार्गका रूपमा नभई इरानको भौगोलिक अवस्थासँग जोडिएको शक्ति र प्रभावको स्रोतका रूपमा हेर्छ र त्यसलाई आफ्नो हितमा प्रयोग गर्नेछ । गार्ड कोप्र्सका प्रवक्ताले अमेरिकी राष्ट्रपति डोनाल्ड ट्रम्पको प्रशासनलाई ओमानसँग भइरहेको वार्तामा ‘हस्तक्षेप नगर्न’ आग्रह गरे । उनका अनुसार वार्ता अन्तिम चरणमा पुगेको छ ।
