: इरानका राष्ट्रपति मसुद पेजेश्कियानले जनतालाई कठिन परिस्थितिको सामना गर्न तयार रहनु पर्ने बताएका छन् । इरानको फार्स समाचार एजेन्सीका अनुसार पेजेश्कियानले भने, ‘केही मानिस अमेरिका र युरोपमा महँगी बढोस् भन्ने चाहन्छन् । तर युद्ध लडिरहेको हाम्रो देशमा महँगी नबढोस् भन्ने अपेक्षा गर्नु मलाई बुझ्न गाह्रो लाग्छ ।’
उनले भने, ‘जब हामी युद्धमा हुन्छौँ, तब वस्तु तथा सामग्रीको अभाव सामना गर्नुपर्ने हुन्छ र हामीले त्यसबाट उत्पन्न कठिनाइ सामना गर्न तयार रहनुपर्छ ।’
पेजेश्कियानले थपे, ‘हामी लड्नेछौँ र युद्धका कठिनाइलाई पनि स्वीकार गर्नेछौं । क्रान्तिका सर्वोच्च नेताले जे निर्णय गर्नु हुन्छ, हामी अन्तिम समयसम्म उहाँसँगै उभिनेछौं ।’ उनले भने, ‘मलाई लड्न डर लाग्दैन । शहादत हाम्रो सबैभन्दा प्रिय सपना हो र हामी मर्ने बेलासम्म मजबुत भएर उभिइरहनेछौं ।’
यसैबीच, इरानको सर्वोच्च राष्ट्रिय सुरक्षा परिषद्का सचिव मोहम्मद बगेर जोल्घाद्रले अमेरिकाले इरानका छवटा माग पूरा नगरेसम्म होर्मुज जलडमरूमध्य नखोलिने बताएका छन् । बीबीसी फारसीका अनुसार ती मागमा इरानमाथि लगाइएका प्रतिबन्धमा छुट, युद्धका कारण भएको क्षतिको क्षतिपूर्ति, इरानी बन्दरगाहमाथिको नौसैनिक नाकाबन्दी तत्काल हटाउने, इरानविरुद्धका धम्की रोक्ने र देशको जफत गरिएको सम्पत्ति फुकुवा गर्नेलगायतका विषय छन् । यी शर्तका कारण अमेरिका र इरानबीच तत्काल कुनै सम्झौता हुने सम्भावना कठिन हुनसक्ने अनुमान गरिएको छ ।
