। अमेरिकी राष्ट्रपति डोनाल्ड ट्रम्पले गत महिना टर्कीमा इरानको डरका कारण आफूले विमान बदलेको कुरा स्वीकार गरेका छन्। पत्रकारहरूसँगको कुराकानीमा उनले नाटो शिखर सम्मेलनमा भाग लिन जाँदा प्रयोग गरेको विमानमाथि आक्रमणको सबैभन्दा बढी खतरा रहेको स्वीकारेका हुन् ।
ट्रम्पले सुरक्षा कारणले गर्दा आफूलाई विमानस्थलको क्याटरिङ ट्रकमा राखेर अर्को विमानसम्म लगिएको पनि बताए।
‘यदि कुनै आक्रमण हुन्थ्यो भने त्यही विमानलाई निसाना बनाइन्थ्यो। सुरक्षा निकायहरूले जे भन्छन्, म त्यही गर्छु। मलाई लगातार धम्कीहरू आइरहन्छन्,’ उनले भने ।
कतारले उपहार दिएको विमानमा गए, सैन्य विमानबाट फर्किए
यसअघि वासिङ्टन पोस्टले ८ जुलाईमा अंकाराबाट प्रस्थान गर्ने क्रममा ट्रम्प क्यामेरासामु बोइङ ७४७-८ एयरफोर्स वानमा सवार भएको दाबी गरेको थियो। यो विमान उनलाई कतारले उपहारमा दिएको थियो र यसैबाट उनले आफ्नो पहिलो अन्तर्राष्ट्रिय यात्रा सुरु गरेका थिए।
रिपोर्टअनुसार, त्यसपछि विमानस्थलमा सामान र खाना पुर्याउने क्याटरिङ गाडीको मद्दतले उनलाई चुपचाप अमेरिकी वायुसेनाको भीआईपी सैन्य विमान सी-३२ए सम्म पुर्याइएको थियो।
सञ्चारमाध्यमलाई पनि थाहा थिएन
पुरानो एयरफोर्स वानमा बसेका पत्रकारहरूलाई ट्रम्प पनि त्यही विमानमा यात्रा गरिरहेका छन् भन्ने भ्रम थियो । रिपोर्टअनुसार, ह्वाइट हाउसका केही कर्मचारीलाई समेत असली योजनाबारे जानकारी थिएन।
उडानका क्रममा पत्रकारहरूलाई आफ्नो झ्यालका सेडहरू बन्द राख्न भनिएको थियो। अर्थात्, उनीहरूलाई बाहिर हेर्ने अनुमति थिएन। यस्तो सावधानी सामान्यतया तब अपनाइन्छ, जब विमान कुनै खतरा भएको क्षेत्रबाट गुज्रिरहेको हुन्छ।
पछि पत्रकारहरूले ट्रम्पलाई झ्यालका सेडहरू किन बन्द राख्न भनिएको थियो भनेर सोधे। ट्रम्पले भने, ‘सायद हामी एउटा खतरनाक उडानमा थियौँ।’
ट्रम्प चढेको सानो विमान पहिले बेलायत पुग्यो
ट्रम्पलाई बोकेको सानो सी-३२ए विमान राति करिब १०:२० बजे बेलायतको आरएएफ मिल्डेनहल एयरबेसमा पुग्यो। यसको केही मिनेटपछि पुरानो एयरफोर्स वान पनि त्यहाँ पुग्यो। यस विमानमा पत्रकारहरू सवार थिए।
यद्यपि, सी-३२ए बाट ओर्लिएपछि ट्रम्प पुरानो एयरफोर्स वानसम्म कसरी पुगे भन्ने स्पष्ट छैन। ट्रम्पसँगै यात्रा गरिरहेका पत्रकारहरूका अनुसार, उनी राति १०:५६ बजे पुरानो एयरफोर्स वानको भर्याङबाट तल ओर्लिंदै गरेको देखिएका थिए।
ट्रम्पले पत्रकारहरूतर्फ हात हल्लाए, तर उनीहरूसँग कुरा गरेनन्। त्यसपछि उनी अमेरिकी सैनिकहरूसँग भेटे र अनि कतारबाट प्राप्त नयाँ विमानतर्फ गए।
‘पहिलोपटक होइन’
राष्ट्रपतिलाई खतराबाट बचाउन उनीहरूको वास्तविक यात्रा लुकाउने तरिका यो नयाँ होइन।
सन् २००० मा तत्कालीन राष्ट्रपति बिल क्लिन्टन पाकिस्तान गएका थिए। त्यतिबेला उनलाई एउटा यस्तो सरकारी विमानबाट पठाइएको थियो, जसमा राष्ट्रपतिको विमानको कुनै पहिचान थिएन।
त्यस्तै, उनको असली एयरफोर्स वान अर्कै बाटोबाट पठाइएको थियो, ताकि मानिसहरूलाई राष्ट्रपति कुन विमानमा छन् भन्ने थाहा नहोस्।
कतारी विमानको सुरक्षामाथि पनि प्रश्न
ट्रम्प जुन बोइङ ७४७-८ विमानबाट टर्की पुगेका थिए, त्यो कतारको शाही परिवारले गत वर्ष अमेरिकालाई दिएको थियो। अमेरिकी रक्षा कम्पनी ‘एलथ्री ह्यारिस टेक्नोलोजीज’ ले यसलाई राष्ट्रपतिको यात्राका लागि तयार पारेको हो।
ट्रम्पले पहिलो पटक यो विमानको प्रयोग १ जुलाईमा नर्थ डकोटा जानका लागि गरेका थिए। केही दिनपछि उनी यही विमानबाट आफ्नो पहिलो विदेश यात्रामा टर्की पुगे।
यस विमानको सुरक्षालाई लिएर पहिलेदेखि नै प्रश्न उठ्दै आएको छ। अमेरिकी सञ्चारमाध्यमको रिपोर्टअनुसार, पुरानो एयरफोर्स वानमा राष्ट्रपतिलाई आक्रमणबाट बचाउन केही विशेष सुरक्षा व्यवस्थाहरू छन्, जुन कतारबाट प्राप्त विमानमा छैनन् वा तिनको क्षमता फरक छ।
नयाँ विमानको सुरक्षामा कुनै कमी छैन : ह्वाइट हाउस
कतारबाट प्राप्त विमानको सुरक्षाबारे उठेका प्रश्नहरूको जवाफ दिँदै ह्वाइट हाउसका सञ्चार निर्देशक स्टिभ चेउङले यस विमानमा ट्रम्प र उनीसँग रहेका व्यक्तिहरूको सुरक्षाका लागि विशेष व्यवस्था गरिएको बताए। उनले भने, ‘अमेरिकाका धेरै शत्रुहरू ट्रम्पलाई निसाना बनाउन चाहन्छन्। त्यसैले उनको सुरक्षाका लागि हामी हरेक आवश्यक तरिका अपनाउँछौँ।’
अर्थात्, ह्वाइट हाउसले नयाँ विमानमा सुरक्षाको कुनै कमी थियो भन्ने कुरा स्वीकार गरेन। आवश्यकता पर्दा ट्रम्पको सुरक्षाका लागि फरक-फरक तरिकाहरू अपनाउन सकिने उसको भनाइ छ।
पेन्टागन अर्थात् अमेरिकी रक्षा विभागले भने यस विषयमा तत्काल कुनै प्रतिक्रिया दिएको छैन।
(एजेन्सीहरूको सहयोगमा)
