: हुथी विद्रोहीहरूले लाल सागर (रेड सी) मा एक व्यापारिक जहाजमाथि आक्रमण गरेका छन्। उक्त आक्रमणमा परी तीन जना पाकिस्तानी नागरिकको मृत्यु भएको छ।
पाकिस्तानका उपप्रधानमन्त्री इसहाक डारले बुधबार सामाजिक सञ्जाल ‘एक्स’ मार्फत एक पोस्ट गर्दै उक्त हमलाको कडा शब्दमा निन्दा गरेका छन्।
उनका अनुसार आक्रमणमा तीन जना पाकिस्तानी नागरिकको ज्यान जानुका साथै एक जना घाइते भएका छन्। उपप्रधानमन्त्री डारले भनेका छन्, 'यस्ता किसिमका आक्रमणले निर्दोष मानिसहरूको ज्यान जोखिममा पार्छ र यो अन्तर्राष्ट्रिय कानुनको उल्लंघन हो। साथै, यसले रातो सागरमा जलयातायातको स्वतन्त्रता, समुद्री सुरक्षा र व्यापारिक जहाजहरूको सुरक्षामा गम्भीर खतरा पैदा गर्दछ।'
पाकिस्तान घटनाको सम्पूर्ण विवरण र परिस्थिति पत्ता लगाउन साउदी अधिकारीहरू तथा यमनको अन्तर्राष्ट्रिय मान्यता प्राप्त सरकारसँग निरन्तर सम्पर्कमा रहेको उनले बताएका छन्।
यसैबीच उपप्रधानमन्त्री डारले रियादस्थित पाकिस्तानी दूतावासलाई सम्बन्धित निकायहरूसँग तत्काल समन्वय र सम्पर्क बढाउन निर्देशन दिइसकेका छन्।
