: सुदूरपश्चिम प्रदेशमा सत्ता समीकरण फेरिएसँगै सरकारको नेतृत्व फेरिने भएको छ। नेपाली कम्युनिस्ट पार्टी (नेकपा) का नेता खगराज भट्ट नेकपा एमालेको समर्थनमा प्रदेशको नयाँ मुख्यमन्त्री बन्ने भएका छन्।
निवर्तमान मुख्यमन्त्री कमलबहादुर शाहले राजीनामा दिएपछि प्रदेशमा नयाँ सरकार गठनको प्रक्रिया अघि बढेको हो। प्रदेश प्रमुख नजिर मियाँले संविधानको धारा १६८ को उपधारा (२) बमोजिम शुक्रबार बिहान ११ बजेसम्म मुख्यमन्त्रीका लागि दाबी पेस गर्न आह्वान गरेका छन्।
नेकपा र एमालेबीच बनेको नयाँ राजनीतिक समीकरणअनुसार भट्टले तोकिएको समयभित्रै मुख्यमन्त्रीमा दाबी पेस गर्ने तयारी गरेका छन्। दाबी पेस भएपछि प्रदेश प्रमुखले शुक्रबार नै उनलाई मुख्यमन्त्री नियुक्त गर्ने तयारी गरेका छन्। त्यसपछि दिउँसो ३ बजे शपथ ग्रहण गराउने तयारी छ।
मुख्यमन्त्रीको शपथसँगै भट्ट नेतृत्वको सरकारले तत्कालै सानो आकारको मन्त्रिमण्डल गठन गर्ने सम्भावना छ। नेकपा र एमालेबीच मन्त्रालय बाँडफाँटमा समेत सहमति भइसकेको बताइएको छ। सहमतिअनुसार नेकपाले मुख्यमन्त्रीसहित चार मन्त्रालय र एमालेले तीन मन्त्रालय पाउनेछन्।
एमालेले आर्थिक मामिला, सामाजिक विकास तथा वन वा कृषि मन्त्रालयमध्ये एउटा मन्त्रालयको नेतृत्व पाउने सम्भावना रहेको स्रोतको दाबी छ।सुदूरपश्चिमको सत्ता परिवर्तनको मुख्य कारण भने बजेट विवाद बनेको छ। गत असार ३१ गते एमालेले बजेटप्रति असहमति जनाउँदै शाह नेतृत्वको सरकारलाई दिएको समर्थन फिर्ता लिएपछि सरकार अल्पमतमा परेको थियो।
त्यसपछि राजनीतिक दबाब बढ्दै गएपछि शाहले बिहीबार प्रदेशसभालाई सम्बोधन गर्दै पदबाट राजीनामा दिएका थिए। शाहको राजीनामासँगै सुदूरपश्चिममा नयाँ सत्ता समीकरणको बाटो खुलेको हो। अब नेकपा–एमाले गठबन्धनले सरकार बनाउने तयारी गरेसँगै लामो समयदेखि प्रदेशको राजनीतिमा सक्रिय खगराज भट्ट पुनः मुख्यमन्त्रीको कुर्सीमा फर्किने निश्चित भएको छ।
नयाँ सरकारका लागि सबैभन्दा ठूलो चुनौती भने राजनीतिक स्थायित्वसँगै बजेट कार्यान्वयन, मन्त्रालय व्यवस्थापन र सत्ता गठबन्धनभित्रको शक्ति सन्तुलन कायम गर्नु हुनेछ।
