: नेपाली खेलकुदको सबैभन्दा ठूलो घरेलु प्रतियोगिता १०औं राष्ट्रिय खेलकुद आयोजना हुने मिति पटक–पटक घोषणा हुँदै स्थगित हुने क्रमले प्रतियोगिताको भविष्य नै अन्योलमा परेको अवस्थामा सरकारले प्रतियोगिताको नयाँ मिति घोषणा गरेको छ।
बिहीबार बसेको राष्ट्रिय खेलकुद परिषद्को १२५औं बोर्ड बैठकले १०औं राष्ट्रिय खेलकुद प्रतियोगिता मंसिर १६ देखि २९ गतेसम्म गर्ने निर्णय गरेको छ। राखेपका अध्यक्ष शिक्षा तथा खेलकुदमन्त्री सस्मित पोखरेलको अध्यक्षातमा बसेको परिषद्को बोर्ड बैठकले प्रथम राष्ट्रिय पारा खेलकुद पुस १५ गतेदेखि सञ्चालन गर्ने पनि निर्णय गरेको छ।
कर्णाली प्रदेशको सुर्खेतमा आयोजना गर्ने घोषणा गरिएको प्रतियोगिता अहिलेसम्म निर्धारित समयमा हुन नसक्दा पटक–पटक नयाँ मिति घोषणा गर्नुपर्ने अवस्था दोहोरिएको छ। ९औं राष्ट्रिय खेलकुद प्रतियोगिता २०७९ सालमा गण्डकी प्रदेशमा सम्पन्न भएपछि १०औं संस्करणको आयोजना गर्ने जिम्मेवारी कर्णाली प्रदेशलाई दिइएको थियो।
त्यतिबेला १०औं राष्ट्रिय खेलकुद २०८१ साल मंसिर २ देखि ९ गतेसम्म कर्णालीमा आयोजना गर्ने गरी राष्ट्रिय खेलकुद परिषद् (राखेप) ले मिति तोकेको थियो। तर, प्रतियोगिता नजिकिँदै जाँदा पूर्वाधार तयारी पूरा नभएकोलगायत कारण देखाउँदै पहिलोपटक मिति सारिएको थियो।राखेपको ११८औं बोर्ड बैठकले मंसिरमा हुनुपर्ने प्रतियोगिता २०८१ साल चैत २३ देखि ३० गतेसम्म आयोजना गर्ने निर्णय गरेको थियो। चैतको मितिमा पनि प्रतियोगिता हुन सकेन।
त्यसपछि १२१औं बोर्ड बैठकले फेरि मिति परिवर्तन गर्दै २०८२ साल जेठ ३ देखि १० गतेसम्म प्रतियोगिता आयोजना गर्ने निर्णय गरेको थियो। तर, आर्थिक स्रोत, पूर्वाधार, व्यवस्थापकीय तयारीलगायत विषयमा विवाद र समस्या देखिएपछि जेठमा पनि प्रतियोगिता हुन सकेन। २०८२ चैत २९ गते बसेको राखेपको १२२औं बोर्ड बैठकले जेठमा प्रतियोगिता गर्न नसकिने निष्कर्षसहित तत्कालका लागि प्रतियोगिता स्थगित गरेको थियो।
लामो समयसम्म नयाँ मिति नै नतोकिएको अवस्थामा खेलकुदमा नयाँ नेतृत्व आएपछि २०८२ कात्तिकमा फेरि प्रतियोगिताको मिति तोकियो। राष्ट्रिय खेलकुद परिषद्को १२३औं बोर्ड बैठकले कर्णालीमा २०८२ साल फागुन १ देखि ७ गतेसम्म प्रतियोगिता आयोजना गर्ने निर्णय गरेको थियो। त्यसपछि मन्त्रिपरिषद्ले पनि उक्त मितिलाई स्वीकृति नदिएपछि प्रतियोगिता हुन सकेन। संघीय सरकार र कर्णाली प्रदेश सरकारबीच प्रतियोगिता तयारी, पूर्वाधार, बजेट तथा जिम्मेवारीका विषयमा आरोप–प्रत्यारोपसमेत भएपछि पनि प्रतियोगितामा अन्योलमा पर्यो।
कर्णाली प्रदेशको वीरेन्द्रनगरमा निर्माण गरिएको रंगशाला १०औं राष्ट्रिय खेलकुदको प्रमुख केन्द्र हो। निर्माणको काम झन्डै ९९ प्रतिशत पूरा भएको दाबी गरिए पनि बाँकी काम पूरा नहुँदा रंगशाला पूर्ण रूपमा सञ्चालनमा आउन सकेको छैन। ठेकेदार कम्पनीले काम छाडेको लामो समय भइसकेको र ठेक्काको म्याद थप वा रद्द गर्ने विषयसमेत टुंगो नलागेकाले प्रतियोगिताको तयारी प्रभावित भएको हो।
रंगशाला निर्माणमा ठूलो रकम खर्च भइसकेको छ। सुर्खेतको रंगशालामा फुटबल मैदान, एथलेटिक्स सिन्थेटिक ट्र्याक, पौडी पोखरी, बहुउद्देश्यीय कभर्डहल, मार्सल आर्ट हललगायत संरचना निर्माण गरिएको छ। तर, राष्ट्रिय खेलकुदका लागि तयार पारिएको पूर्वाधार प्रतियोगिता नै नहुँदा प्रयोगविहीन बन्ने अवस्था आएको छ।
