: नेपाली कम्युनिस्ट पार्टी (नेकपा)ले कोशी प्रदेश सरकारमा पाँच जना मन्त्री नामको टुंगो लगाएको छ।
नेकपाले भौतिक पूर्वाधार विकास मन्त्रीमा जीवन आचार्य, सामाजिक विकास मन्त्रीमा गीता तिमल्सिना, पर्यटन, वन तथा वातावरण मन्त्रीमा खिनु लिम्बु, आन्तरिक मामिला तथा योजना मन्त्रीमा गुम्बु शेर्पा र भौतिक पूर्वाधार राज्य मन्त्रीमा सपना दर्जीलाई टुंगो लगाएको हो।
नेकपा एमालेका अध्यक्ष केपी शर्मा ओली र नकेपाका संयोजक पुष्पकमल दाहालले कार्यगत एकता गर्ने निर्णय गरेसँगै सातवटै प्रदेशमा सरकार पुनर्गठनको प्रक्रिया सुरू भएको हो। सोही बमोजिम कोशीमा एमाले र नेकपा मिलेर सरकार बनाउन लागेको हो।
यसअघि एमाले र कांग्रेस मिलेर कोशीमा सरकार बनाएको थियो। दुई शीर्ष नेताबीच कार्यगत एकता गर्ने निर्णय गरेसँगै कांग्रेस सरकारबाट बाहिरिएको थियो। कोशीमा हालका मुख्यमन्त्री हिक्मत कार्कीलाई नै निरन्तरता दिने एमालेले निर्णय गरेको छ। उनको क्याबिनेटमा रहेका एमालेका मन्त्रीहरू भने निरन्तरता पाउनेछन्।
