: नागपञ्चमीको अवसरमा भक्तपुर नगरपालिका- १० थालाछेँस्थित नागपोखरीमा विशेष पुजाअर्चना गरिएको छ । बिहानैदेखि श्रद्धालुहरुले दुध, अक्षता, चन्दन र फूल लगायतले श्रद्धापूर्वक पूजाआराधना गरिरहेका छन् । नागपोखरी परिसर भक्तजनले भरिभराउ भएको छ ।
मल्लकालमा भुपतिन्द्र मल्लले पाँच तले मन्दीर बनाउँदा थालाछेँको माटो प्रयोग गरीएको र त्यहाँ पोखरी निर्माण भएको किंवदन्ती रहेको स्थानीय वीरेन्द्र जति बताउँछन् । पोखरीको छेउमा उमामहेश्वरको मूर्ति स्थापना गरिएको छ । उमामहेश्वरको रक्षक समेत मानिने नाग देवताको प्रतिमा पोखरीको बीचमा बिराजमान देखिन्छ ।
नागपोखरी संरक्षण समितिका अध्यक्ष अनिल देउपालाका अनुसार भक्तपुरबासीको लागि नागको ठुलो महत्व छ । प्रत्येक घरमा नागको पूजा गरिन्छ भने नागलाई आवतजावत गर्न सहज होस् भन्ने हेतुले हरेक घर निर्माण गर्दा नाग वारपार गर्न सक्नेगरी एकछाउमा बाटो राख्ने गरिन्छ ।
नागपोखरी संरक्षणका लागि भक्तपुर नगरपालिकाले समेत सहयोग गरेको र दिनभर स्थानीयको सहभागितामा भजन कीर्तन आयोजना गरिएको समितिका सदस्य सत्यनारायण रन्जितकारले बताए । 'साँझमा दीपावली र सास्कृतिक कार्यक्रम हुनेछ ।'उनले भने ।
भक्तपुर नगरपालिकाका प्रमुख सुनिल प्रजापति प्रकृति र जनजीवनबीच गहिरो अन्तरसम्बन्ध रहेकोले नागपूजाको महत्व ठुलो रहेको बताउँछन् ।
भक्तपुर पोखरीहरूको नगरी भएको र नागपोखरीले मौलिक संस्कृतिको आफ्नै विशिष्ट पहिचान बनाएको उनले बताए । आन्तरिक एवं बाह्र धार्मिक पर्यटनको लागि पनि यो महत्वपूर्ण भएको स्थानीयको भनाइ छ । नाग देवता प्रसन्न भए वर्षा हुने, कृषि उत्पादन बढ्ने, धनको रक्षा हुने सुखशान्ति मिल्ने धार्मिक जनबिश्वास रहेको छ ।
