। जाजरकोटमा बिरामीको संख्या बढिरहेको छ । तर, अस्पतालमा लामो समयदेखि पर्याप्त चिकित्सक नहुँदा उपचारमा समस्या देखिएको छ ।
जाजरकोट अस्पतालमा लामो समयदेखि चिकित्सक नभएपछि चिकित्सको व्यवस्था गरिदिन मुख्यमन्त्री मंगलबहादुर शाहीलाई आग्रह गरिएको छ । अस्पताल व्यवस्थापन समितिका पूर्वअध्यक्ष समेत रहेकी कार्यदलको सदस्य धर्मशिला बस्नेतले मुख्यमन्त्री शाहीलाई तत्काल चिकित्सक पठाइदिन आग्रह गरिएको जानकारी दिइन् ।
५० शैय्याको जिल्ला अस्तततालमा डाक्टर नहुँदा दैनिक उपचार सेवा प्रभावित भएको छ । स्वास्थ्य सेवा कार्यालय जाजरकोटका प्रमुख सुनिल पुनले चिकित्सकको अभावका कारण सेवा प्रवाहमा समस्या गहिरो भएको बताए ।
यता मुख्यमन्त्री शाहीले जाजरकोट अस्पतालमा डाक्टरको व्यवस्थापन बारे आफू गम्भीर रहेको बताएका छन् ।
अस्पतालमा उपचारका लागि आउने बिरामीको संख्या बढ्दै गए पनि पर्याप्त चिकित्सक नहुँदा नियमित सेवा सञ्चालनमा समस्या भएको छ । विशेषगरी पछिल्लो समय बाढीपहिरोका कारण घाइते तथा विस्थापित नागरिकमा स्वास्थ्य समस्या देखिन थालेपछि अस्पतालमा बिरामीको चाप बढेको छ ।
ज्वरो, रुघाखोकी, चोटपटक तथा अन्य स्वास्थ्य समस्या लिएर आउने बिरामीको संख्या बढे पनि जनशक्ति अभावका कारण प्रभावकारी सेवा दिन कठिन भइरहेको स्वास्थ्यकर्मीहरू बताउँछन् ।
अस्पतालमा चिकित्सकको अभाव हुँदा आकस्मिक तथा नियमित स्वास्थ्य परीक्षण, विशेषज्ञ सेवा र बिरामीको उपचारमा समेत असर परेको छ । सामान्य उपचारका लागि समेत बिरामीले लामो समय कुर्नुपर्ने अवस्था रहेको सेवाग्राहीको गुनासो छ ।
जाजरकोटका दुर्गम बस्तीबाट उपचारका लागि जिल्ला अस्पताल आउने नागरिकका लागि चिकित्सक अभाव थप समस्या बनेको छ । जिल्लामा बाढीपहिरोको जोखिम बढिरहेका बेला घाइते तथा बिरामीको उपचारका लागि अस्पतालमा पर्याप्त चिकित्सक र स्वास्थ्यकर्मीको व्यवस्था गर्नुपर्ने मागसमेत उठेको छ ।
स्वास्थ्यकर्मीहरूले विपद्का बेला अस्पतालमा बिरामीको चाप अझ बढ्न सक्ने भएकाले तत्काल आवश्यक चिकित्सक तथा स्वास्थ्यकर्मीको व्यवस्थापन गर्नुपर्ने बताएका छन् । उनीहरूका अनुसार जनशक्ति थप गर्न नसकिएमा विपद् प्रभावित नागरिकलाई समयमै गुणस्तरीय स्वास्थ्य सेवा उपलब्ध गराउन कठिन हुने अवस्था छ ।
स्थानीयवासीले जिल्ला अस्पतालमा दरबन्दीअनुसार चिकित्सकको व्यवस्था गर्नुका साथै विशेषज्ञ चिकित्सकको नियमित सेवा उपलब्ध गराउन प्रदेश तथा संघीय सरकारसँग माग गरेका छन् । विपद्का बेला उपचार सेवामा थप दबाब पर्ने भएकाले तत्काल अस्थायी रूपमा भए पनि चिकित्सक थप गर्नुपर्ने उनीहरूको भनाइ छ ।
पहिरो विस्थापितमा ज्वरो र रुघाखोकीको समस्या
बाढी पहिरोबाट विस्थापित भएका स्थानीयबासीहरु विरामी भएका छन् । भेरी नगरपालिका–२/३ बाट विस्थापित भई विद्यालयमा बस्दै आएका विस्थापितहरुमा रुखाघोकी , ज्वारो देखिएको हो । जाँचको क्रममा ६९१ जनामा यस्तो समस्या देखिएको चिकित्सकले जानकारी दिएका छन् । प्रमुख जिल्ला अधिकारी खडानन्द अधिकारीका अनुसार अस्थायी शिविरमा रहेकाहरुमा स्वास्थ्य समस्या देखिन थालेको हो ।
सोमबार भेरी नगरपालिका र कर्णाली प्रदेश अस्पताल, सुर्खेतबाट खटिएका चिकित्सक तथा स्वास्थ्यकर्मीको टोलीले सेल्टरमा रहेका ९० जना विस्थापितको स्वास्थ्य परीक्षण तथा उपचार गरेको थियो विस्थापितहरुमा पछिल्ला दिनमा विस्थापितमा ज्वरो र रुघाखोकीका लक्षण देखिन थालेको भेरी नगरपालिकाको स्वजास्थ्य शाखाले जानकारी दिएको छ । खानेपानीका अधिकांश स्रोत प्रदूषित भएकाले सुरक्षित खानेपानीको व्यवस्थापन मुख्य चुनौती भएको बताएको छ ।
भेरी नगरपालिकाका वडा नं. १, २, ३ र ४ का विभिन्न बस्तीमा गएको पहिरोमा परी कम्तीमा चारजनाको मृत्यु भएको छ भने १० जना घाइते भएका छन् । पहिरोका कारण सयौँ नागरिक विस्थापित भएका छन्। उनीहरू विद्यालय तथा अन्य सुरक्षित स्थानमा आश्रय लिएर बसिरहेका छन् ।
वृद्धवृद्धा, बालबालिका, गर्भवती महिला तथा सुत्केरी आमासमेत सेल्टरमा रहेकाले पानीजन्य तथा कीटजन्य रोग फैलिन सक्ने जोखिम उच्च रहेको उनीहरूको भनाइ छ ।
नगरपालिकाले विस्थापित बसेका सेल्टरमा स्वास्थ्य डेस्क स्थापना गरी नियमित स्वास्थ्य परीक्षण तथा उपचार सेवा सञ्चालन गरिरहेको छ ।
