गुगलले आफ्नो नयाँ ल्यापटप ‘गुगलबुक’ सार्वजनिक रूपमा प्रस्तुत गर्ने मिति तय गरेको छ । कम्पनीले आगामी १५ सेप्टेम्बरमा अमेरिकाको न्यूयोर्क शहरमा प्रत्यक्ष मिडिया कार्यक्रम आयोजना गर्ने जनाएको छ ।
कार्यक्रममा गुगलले गुगलबुकको सफ्टवेयर, जेमिनी एआईसँगको एकीकरण तथा यसको मूल एन्ड्रोइड कोडबेसबारे विस्तृत जानकारी दिनेछ । सहभागी पत्रकारहरूले लेनोभो, एएसयूएस र एचपीलगायत साझेदार कम्पनीहरूले तयार पारेका गुगलबुक उपकरणहरू प्रयोग गरेर हेर्न सक्नेछन् ।
यसअघि यसै वर्ष आयोजित ‘द एन्ड्रोइड शो’ कार्यक्रममा गुगलले आफ्नो नयाँ प्रिमियम ल्यापटप शृंखलाको पहिलो झलक सार्वजनिक गरेको थियो । कम्पनीका अनुसार यी ल्यापटपहरू जेमिनी एआईलाई केन्द्रमा राखेर सुरुदेखि नै विकास गरिएका हुन् ।
गुगलले प्रदर्शनका क्रममा जेमिनीको सहयोगमा आफ्नै विजेट बनाउन सकिने सुविधा, ‘म्याजिक पोइन्टर’ तथा एन्ड्रोइड स्मार्टफोनसँग अझ राम्रोसँग जोडिने सुविधाबारे जानकारी दिएको थियो ।
तर त्यसपछि कम्पनीले गुगलबुकसम्बन्धी थप विवरण सार्वजनिक गरेको थिएन । हालै आयोजित पिक्सेल ११ सार्वजनिक कार्यक्रममा पनि गुगलले यी ल्यापटपबारे धेरै जानकारी दिएन ।
कम्पनीले भने गुगलबुकबारे केही समयअघि लेनोभो, एएसयूएस, एचपीलगायत हार्डवेयर साझेदारहरूसँग थप जानकारी दिने जनाएको थियो ।
अब भने गुगलबुक प्लेटफर्मबारे विस्तृत जानकारी सार्वजनिक हुने कार्यक्रमको मिति निश्चित भएको छ । न्यूयोर्कमा हुने उक्त कार्यक्रममार्फत गुगलले गुगलबुकको सफ्टवेयर, एआई सुविधा र साझेदार कम्पनीका हार्डवेयरबारे थप विवरण सार्वजनिक गर्ने अपेक्षा गरिएको छ ।
