— बेलायतका राजकुमार ह्यारी र मेगन मार्कल बेलायत फर्किने तयारी गरेका छन्।
‘डेली टेलिग्राफ’ र ‘द सन’ले पहिलोपटक सार्वजनिक गरेको विवरणअनुसार ह्यारी र मेगन यसै महिनाको अन्त्यमा अमेरिकाबाट लन्डनबाहिरको निजी, गैरराजकीय निवासमा बसाइँ सर्ने तयारीमा छन् ।
उनीहरूका छोराछोरी ७ वर्षीय राजकुमार आर्ची र ५ वर्षीया राजकुमारी लिलिबेटले सेप्टेम्बरदेखि बेलायती विद्यालयमा अध्ययन सुरु गर्ने भएका छन् ।
राजा चार्ल्सलाई आइतबार उनीहरूको बसाइँ सर्ने योजनाबारे जानकारी गराइएको थियो । ह्यारी वा मेगनमध्ये कसैले पनि राजपरिवारका सक्रिय सदस्यका रूपमा आफ्नो भूमिका पुनः सुरु गर्ने तत्काल कुनै योजना छैन ।
यस वर्ष जुलाईमा उनीहरु आफ्ना छोराछोरीसहित राजाको ग्लुस्टरसायरस्थित हाईग्रोभ निवास पुगेका थिए । तर, त्यतिबेला उनीहरूको बेलायत फर्किने योजनाबारे छलफल नभएको बुझिएको छ ।
बीबीसीका अनुसार गत साताअघिसम्म राजा चार्ल्सलाई उनीहरूको बसाइँ सर्ने योजनाबारे जानकारी थिएन । तर, निजी र पारिवारिक हैसियतमा परिवारसँग थप समय बिताउने अवसर पाउँदा राजा खुसी छन् ।
राजकुमार ह्यारी र मेगनको आधिकारिक हैसियतमा कुनै परिवर्तन हुने अपेक्षा गरिएको छैन । उनीहरू निजी नागरिककै रूपमा रहनेछन् ।
राजकुमार विलियम र राजकुमारी क्याथरिनलाई पनि उनीहरूको योजनाबारे जानकारी गराइएको छ ।
उनीहरुले सन् २०२० को सुरुवातमा बेलायत छाड्दै राजकीय जिम्मेवारीबाट पछि हटेका थिए । त्यसै वर्षको मार्चमा उनीहरू क्यालिफोर्नियामा बसाइँ सरेका थिए ।
त्यसयता परिवारभित्रको सम्बन्धमा तनाव देखिँदै आएको थियो । गत जुलाईमा राजा चार्ल्स र रानी क्यामिलासँग भएको भेटलाई उनीहरूको सम्बन्धमा आएको महत्त्वपूर्ण सुधारका रूपमा हेरिएको छ ।
सन् २०२२ मा महारानी एलिजाबेथ द्वितीयको अन्त्येष्टिमा सहभागी भएयता राजकुमार ह्यारी र मेगन सँगै बेलायत आएका थिएनन् ।
