: राष्ट्रिय प्रजातन्त्र पार्टीले बागमती प्रदेशसभाका सदस्य उद्धव थापालाई पार्टीबाट निष्कासन गरेको छ। बिहीबार बसेको पार्टीको कार्यसम्पादन बैठकले प्रदेशसभा सदस्य थापालाई साधारण सदस्यसमेत नरहने गरी निष्कासन गरेको हो।
अध्यक्ष राजेन्द्र लिङ्देनले प्रदेशसभा सदस्य थापाले पार्टीको निर्देशन उल्लंघन गरेकाले कारबाही गरेको बताए। बागमती प्रदेशसभामा एमालेलाई समर्थन गर्ने पार्टीको निर्णय नरहेको उनले बताए। तर, त्यस विपरीत थापाले समर्थन पत्र बुझाएको र स्पष्टीकरण समेत नदिएको अध्यक्ष लिङ्देनले बताए।
'बागमती प्रदेशसभामा पार्टीको निर्देशन विपरीत प्रदेशसभा सदस्य उद्धव थापाले एमालेलाई समर्थन पत्र बुझाएकाले अनुशासन समितिले स्पष्टीकरण सोधेको थियो। स्पष्टीकरणको जवाफ समयमा नदिएपछि र समर्थन पनि फिर्ता नलिएपछि कार्यसम्पादन समितिले पार्टीको साधारण सदस्य समेत नरहने गरी कारबाही गरेको हो,' अध्यक्ष लिङ्देनले भने।
