: रूसले रातभर गरेका मिसाइल आक्रमणमा युक्रेनको राजधानी किभ र आसपासका क्षेत्रमा कम्तीमा ५ जनाको मृत्यु भएको छ भने २३ जना घाइते भएका छन्।
युक्रेनको स्टेट इमर्जेन्सी सर्भिसका अनुसार बिहीबार भएको आक्रमणमा आवासीय भवन तथा गोदामहरूलाई मुख्य निशाना बनाइएको थियो। आक्रमण लगत्तै खटिएका उद्धार टोलीहरू भग्नावशेषमा रहेका मानिसहरूको खोजीमा छन्। उद्धारकर्ताहरूले अहिलेसम्म एक जनालाई भग्नावशेषबाट जीवितै उद्धार गर्न सफल भएका छन्।
किभका मेयर भिटाली क्लिट्स्कोले रातिको आक्रमणमा एउटा बाल अस्पतालमा समेत क्षति पुगेको जनाएका छन्। आक्रमणका कारण अस्पतालका झ्यालका सिसाहरू फुटेका छन् भने परिसरमा पारिएका धेरै गाडीहरूमा आगो लागेको छ। उनका अनुसार दक्षिण-पश्चिमी किभको सोलोम्यान्स्की जिल्लास्थित एउटा औद्योगिक क्षेत्रमा पनि मिसाइल प्रहार भएको छ।
यस्तै, किभ क्षेत्रकै ब्रोभरी जिल्लामा भएको आक्रमणमा एक जनाको मृत्यु हुनुका साथै अर्का एक जना घाइते भएको क्षेत्रीय गभर्नर टिमुर तकाचेन्कोले पुष्टि गरेका छन्।
आक्रमणको जोखिमलाई मध्यनजर गर्दै क्षेत्रीय प्रशासनले राति नै सर्वसाधारणलाई सुरक्षित स्थानमा जान चेतावनी जारी गरेको थियो। युक्रेनमाथि रूसको निरन्तर आक्रमण बढेसँगै छिमेकी मुलुक पोल्यान्डको सेनाले समेत 'सावधानीमूलक सैन्य विमान अभियान' सुरु गर्ने घोषणा गरेको छ।
