। अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले पासपोर्टको ठेक्का प्रकरणमा मुद्दा लैजानुअघि प्रधानमन्त्रीसँग छलफल भएको संसदीय समितिलाई नै जानकारी दिएका छन् ।
राज्य व्यवस्था समितिमा सांसदहरूले उठाएका प्रश्नको जवाफ दिँदै प्रमुख आयुक्त राईले यस्तो छलफललाई स्वाभाविक भएको आसय व्यक्त गरेका छन् ।
‘प्रधानमन्त्रीज्यूले बोलाउनु भएको हो कि होइन भन्नेमा प्रश्नमा छलफल गर्न बोलाउन सकिन्छ । सुझाव लिन बोलाउन सकिन्छ त्यो विषयमा के भइरहेको हो भनेर तपाईंले के गरिराख्नु भएको छ भनेर बोलाउन सकिन्छ’ प्रमुख आयुक्त राईले भने,’त्यसैले हामी गएर छलफल गर्यौं ।’
अहिले मुद्दा दर्ता भइसकेकोले त्यसमा केही कैफियत छ कि छैन भन्ने अभियोजन नै हेर्न उनले सांसदहरूलाई सुझाव दिए ।
‘अभियोजनको त्यो पत्र तपाईंहरूले हेर्नुस् स्पष्ट देख्नुहुन्छ । कैफियत बिना हामीले लगेको अवस्था छैन’ उनले भने,’ यसमा म धेरै प्रवेश गर्न चाहन्नँ ।’
पासपोर्टको ठेक्का प्रकरणमा प्रधानमन्त्री कार्यालयमा ७ घण्टा राखेर दबाब मुद्दा चलाउन दबाब दिएको घटना बाहिर आएको थियो । त्यो विषयमा सांसदहरूले बिहीबारको बैठकमा प्रश्न गरेका थिए ।
