: विराटनगरमा विद्युत्को तार जोड्ने क्रममा करेन्ट लागेर एक जनाको मृत्यु भएको छ। विराटनगर महानगरपालिका–४ का अन्दाजी ४५ वर्षीय मनोजकुमार राजवंशीको करेन्ट लागेर मृत्यु भएको प्रहरीले जनाएको छ।
प्रहरीका अनुसार राजवंशी विराटनगर–१३ स्थित साल्ट ट्रेडिङ नजिकै सुरेन्द्र थापाको घरमा डेरा गरी बस्दै आएका थिए। कोठामा मुसाले काटेको वाइरिङको तार जोड्ने क्रममा शनिबार राति करिब ११:३० बजेतिर उनलाई अचानक करेन्ट लागेको प्रहरीले जनाएको छ।
करेन्ट लागेर गम्भीर घाइते भएका राजवंशीलाई उपचारका लागि विराट शिक्षण अस्पताल लगिएको थियो। तर अस्पताल पुर्याउनासाथ चिकित्सकले उनलाई मृत घोषणा गरेका थिए।
मोरङ प्रहरीका डीएसपी सन्तोष श्रेष्ठका अनुसार मुसाले काटेको बिजुलीको तार जोड्ने क्रममा राजवंशीलाई करेन्ट लागेको प्रारम्भिक अनुसन्धानबाट खुलेको छ। घटनाको थप अनुसन्धान इलाका प्रहरी कार्यालय रानीका इन्स्पेक्टर प्रवीण घिमिरे नेतृत्वको टोलीले गरिरहेको छ।
