: मोरङको मिक्लाजुङ गाउँपालिका–६, लालमारीस्थित मयुर सामुदायिक वनबाट प्रहरीले तीन थान भरुवा बन्दुकका साथै तिनमा प्रयोग हुने विभिन्न सामग्री बरामद गरेको छ ।
वन क्षेत्रमा चोरी-शिकार हुने गरेको विशेष सूचनाका आधारमा इलाका प्रहरी कार्यालय उर्लाबारीबाट खटिएको टोलीले आइतबार साँझ गस्ती गरेको थियो । सोही क्रममा जंगलको झाडीमा शंकास्पद अवस्थामा लुकाएर राखिएको एउटा बोरा फेला परेको प्रहरीले जनाएको छ ।
बोरा खोलेर जाँच गर्दा तीन थान भरुवा बन्दुक, एक थान फलामको नाल, १९ ग्राम २४० मिलिग्राम बारुद, ९८ वटा फलामका बेरिङ र १३ वटा फलामका टुक्रा फेला परेको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए । प्रहरीका अनुसार बरामद गरिएका सबै सामग्री झाडीमा लुकाएर राखिएको अवस्थामा भेटिएका हुन्। ती सामग्रीलाई नियन्त्रणमा लिएर इलाका प्रहरी कार्यालय उर्लाबारीमा राखिएको छ ।
जंगल क्षेत्रमा चोरी-शिकारमा संलग्न समूहले प्रयोग गर्ने उद्देश्यले बन्दुक तथा अन्य सामग्री लुकाएको हुन सक्ने प्रहरीको प्रारम्भिक अनुमान छ । बरामद हतियार कसले र कुन प्रयोजनका लागि राखेको हो भन्ने विषयमा थप अनुसन्धान भइरहेको डीएसपी मिश्रले बताए ।
