। रसुवा बाढी प्रभावितहरूका लागि संघ र स्थानीय सरकारहरूले सहकार्य गरेर रसुवा र नुवाकोटका २६ स्थानमा अस्थायी आश्रयस्थल तथा राहत वितरण केन्द्र सञ्चालनमा ल्याएका छन् ।
आइतबार यी केन्द्रहरूमा तीन हजार ४५४ जनाले अस्थायी आश्रय तथा राहत प्राप्त गरेको प्रधानमन्त्री तथा मन्त्रिपरिषद्को कार्यालयले जनाएको छ ।
नुवाकोटमा मात्रै १६ आश्रयस्थलमा दुई हजार २७४ जनाले आश्रय लिएको प्रधानमन्त्री कार्यालयले जनाएको छ ।
नुवाकोटमा विदुर नगरपालिका तुप्चे क्षेत्रका प्रभावितलाई पुस्तकालय शिविर, त्रिशुली ढुंगे क्षेत्र र सिमचौरका प्रभावितलाई सेफहाउस/किरियापुत्री भवन, बेत्रावतीका प्रभावितलाई स्वास्थ्य चौकी, बट्टार क्षेत्रका प्रभावितलाई कभर्ड हल र देवीघाटका प्रभावितलाई आयुर्वेद वैकल्पिक चिकित्सालयमा अस्थायी आश्रयस्थल बनाएर राखिएको छ ।
यस्तै, बेत्रावती भैँसे क्षेत्रका प्रभावितलाई सुन्दरी क्यैरिनी मावि, त्रिशूली बजार क्षेत्रका प्रभावितलाई कोलनी कभर्ड हल–भैरुम मावि, रिमाल डाँडा र इन्द्रायणि आधारभूत विद्यालयमा शिविर बनाएर राखिएको छ ।
यस्तै, विदुर–३ देवीघाट सिटखाली क्षेत्रका प्रभावितलाई रणभुवनेश्वरी मावि र वडा कार्यालयमा व्यवस्थापन गरिएको छ ।
विदुर–९ का प्रभावितलाई त्रिशूली आवि र शुलक्षणा माविमा राखिएको छ भने, बेलकोटगढीको रातमाटे जिलिङ क्षेत्रका प्रभावितलाई महादेव मावि, किस्पाङ गाउँपालिका–५ का प्रभावितलाई कार्की मनकामना आवि र त्रिभुवन मावि तथा रसुवाका केही प्रभावितलाई बट्टारको तामाङ प्लाजामा राखिएको छ ।
यस्तै, उद्धार गरिएका घाइतेका लागि विदुर–२ को सेफहाउस, देवीघाट आयुर्वेद वैकल्पिक चिकित्सालय, बेलकोटगढी–७ को महादेव माध्यमिक विद्यालय र विदुर–९ को शुलक्षणा माध्यमिक विद्यालयमा उपचारसँगै राखिएको छ ।
उता, रसुवाका बाढी प्रभावितका लागि १० वटा अस्थायी आश्रयस्थल सञ्चालनमा ल्याइएको र त्यसमा एक हजार १८० जनाले आश्रय लिएको प्रधानमन्त्री कार्यालयले जनाएको छ ।
उत्तरगया गाउँपालिका–२ को डाँडागाउँ, आमाछोदिङ्गो गाउँपालिकाका–१ र २ मा हाकु, पाङलिङ र ग्रेमा आश्रयस्थल बनाइएका छन् ।
यस्तै, गोसाइकुण्ड गाउँपालिका–१, २, ३ र ५ का थुमन, दालफेदी, खैदी, बृद्धिम, लिङलिङ र स्याफ्रुबेँसी र आमाछोदिङ्गो गाउँपालिकाका–१ र २ का हाकु, पाङ्ग्रङ र ग्रेमा आश्रयस्थ सञ्चालन गरिएको प्रधानमन्त्री कार्यालयले जनाएको छ ।
