: रसुवा बाढीमा परी नवलपरासीको नारायणी नदी (गण्डक क्षेत्र)मा फेला परेका शवको व्यवस्थापन गर्न थालिएको छ। सोमबार दिउँसोसम्म ४५ वटा शवको व्यवस्थापन गरिएको जिल्ला प्रहरी कार्यालयका सूचना अधिकारी डिएसपी मदन थापाले जानकारी दिए।
शव व्यवस्थापनका लागि नेपाली सेना, नेपाल प्रहरी, शसस्त्र प्रहरी र स्वास्थ्यकर्मीहरु खटिएका छन्। गण्डक क्षेत्रमा फेला परेका शवहरु राख्ने ठाउँ अभाव भएपछि पृथ्वीचन्द्र अस्पताल परासी, बुटवल, भैरहवा र कपिलवस्तु अस्पतालमा पठाइएको छ। त्यहाँ पठाइएका सबै शवको नवलपरासीको सुनवल नगरपालिका–४ अलकत्रा डाँडामा व्यवस्थापन भइरहेको छ।
व्यवस्थापन गरिएका ४५ शवमध्ये पृथ्वीचन्द्र अस्पताल परासीमा रहेका २० र बुटवल प्रादेशीक अस्पतालमा रहेका २५ शवको व्यवस्थापन गरिएको डिएसपी थापाले बताए । अहिले पृथ्वीचन्द्र अस्पतालमा मात्र ७० बढी शव रहेका छन् । ती सबैको डिएनए परीक्षण गरी व्यवस्थापनका लागि पठाइँदै गरिएको छ । नम्बरका आधारमा अभिलेख खोजी गर्न सकिने भएकाले आफन्तले पछि पनि शव आफन्तको हो वा होइन भन्ने पहिचान गर्न सक्ने प्रहरीले जनाएको छ।
पृथ्वीचन्द अस्पतालका दुई बुटवल एक गरी तीन जना फरेन्सी चिकित्सकबाट डिएनए परीक्षण भइरहेको पृथ्वीचन्द्र अस्पतालका मेडिकल सुपरिडेन्डेन्ट डाक्टर बृज यादवले जानकारी दिए । सोमबारसम्म गण्डक क्षेत्रमा फेला परेका शवको संख्या १ सय ५५ पुगेको छ।
