: संसद बैठक आह्वानका लागि नेपाली कांग्रेसले सभामुख डोल प्रसाद अर्यालको ध्यानाकर्षण गराएको छ। कांग्रेस संसदीय दलका नेता भीष्मराज आङदेम्बेले संसदको बैठक आह्वान गर्नका लागि कार्यव्यवस्था परामर्श समितिको बैठक बोलाउन माग गर्दै सभामुख अर्याललाई ध्यानकर्षण पत्र बुझाएका छन्।
ध्यानाकर्षण पत्र बुझ्दै सभामुख अर्यालले मंगलबार कार्यव्यवस्था परामर्श समितिको बैठक बोलाएर संसद बैठक सञ्चालनको टुङ्गो लगाउने बताएको आङदेम्बेले जानकारी दिए।
देशमा आएको विपद्का कारण केही दिन संसदको बैठक स्थगित गरिएको भएपनि अब तत्काल सञ्चालन गर्न आफुले सभामुखको ध्यानाकर्षण गराएको आङदेम्बेको भनाई छ।
विपद् व्यवस्थापन, राहत वितरणमा हुने दोहोरोपना रोक्न र वास्तविक पीडितलाई राज्य भएको अनुभूति दिलाउन संसद तथा संसदीय समितिहरूबाट सूक्ष्म निगरानी र निर्देशन हुनुपर्ने आङदेम्बेले बताए। सत्तारूढ दलका सभापतिको आह्वानमा बसेको सर्वदलीय बैठकका निर्णयहरूलाई प्रभावकारी रूपमा कार्यान्वयन गराउन संसदको भूमिका अपरिहार्य रहेको आङदेम्बेको भनाइ छ।
