: भोटेकोशी नदीमा आएको विनाशकारी बाढीबाट प्रभावित क्षेत्रमा खोजी, उद्धार तथा व्यवस्थापनका लागि नेपाली सेनाले व्यापक रूपमा फौज परिचालन गरेको छ। रसुवा, नुवाकोट र धादिङ हुँदै चितवनसम्म सेनाले खोजीकार्यलाई तीव्रता दिएको छ।
बाढीमा ज्यान गुमाएका नागरिकहरुको शव चितवनका नदी तटीय क्षेत्रमा समेत फेला पर्न थालेपछि ड्रोन र रबरबोटलगायतका उद्धार सामग्रीसहित ४३६ जनाको संयुक्त फौज परिचालन गरिएको सेनाले जनाएको छ।
सेनाको टोलीले चितवनका विभिन्न नदी तटीय क्षेत्रमा सम्भावित स्थान पहिचान गर्दै ड्रोनमार्फत खोजी गर्नुका साथै रबरबोटको प्रयोगबाट नदी तथा आसपासका क्षेत्रमा बेपत्ताको खोजी गरिरहेको छ।
बाढीले ठूलो मानवीय तथा भौतिक क्षति गरेको अवस्थामा बेपत्ताको खोजी, फेला परेका शवको उद्धार तथा सुरक्षित व्यवस्थापनलाई प्राथमिकतामा राखेर खोजी तथा उद्धार तीव्र पारिएको सेनाले जनाएको छ।
