: देश प्राकृतिक विपत्तिको चपेटामा परिरहेका बेला नेपाल वैदेशिक रोजगार व्यवसायी संघको पहलमा वैदेशिक रोजगार व्यवसायीहरूले प्रधानमन्त्री दैवी प्रकोप उद्धार कोषमा १ करोड ५० लाख सहयोग गरेका छन्।
संघको पहलमा संकलित उक्त रकम व्यवसायीहरूको प्रतिनिधिमण्डलले अर्थमन्त्रीलाई भेट गरी प्रधानमन्त्री राहत कोषमा हस्तान्तरण गरेको हो। विपद्को कठिन घडीमा राज्यको राहत तथा उद्धार अभियानमा हातेमालो गर्ने उद्देश्यले व्यवसायीहरूले सामूहिक रूपमा सहयोग जुटाएका हुन्।
संघले बाढी तथा पहिरोबाट प्रभावित नागरिकको उद्धार, राहत र पुनःस्थापनाका लागि सबै क्षेत्रबाट सहयोग र सहकार्य आवश्यक रहेको जनाएको छ। नेपाल वैदेशिक रोजगार व्यवसायी संघले भनेको छ, ‘देशमा परेको यो महान् विपत्तिको समयमा पीडित नागरिकको साथमा उभिनु हामी सबैको साझा दायित्व हो। वैदेशिक रोजगार व्यवसायीहरू केवल व्यवसायिक क्षेत्रमा मात्र नभई सामाजिक उत्तरदायित्व निर्वाह गर्ने पक्षमा पनि प्रतिबद्ध छन्। त्यसैले संघको पहलमा व्यवसायीहरूबाट रकम संकलन गरी प्रधानमन्त्री राहत कोषमा १ करोड ५० लाख रुपैयाँ सहयोग गरेका हौँ।’
संघले विपत्तिबाट प्रभावित परिवारको तत्कालीन आवश्यकता पूरा गर्न राहतसँगै दीर्घकालीन पुनःस्थापनामा समेत राज्य, निजी क्षेत्र, संघसंस्था र आम नागरिकबीच सहकार्य आवश्यक रहेको जनाएको छ। विपद्को समयमा वैदेशिक रोजगार व्यवसायीहरूले देखाएको यो सहयोगले उद्धार तथा राहत अभियानलाई थप प्रभावकारी बनाउन योगदान पुग्ने अपेक्षा गरिएको छ। संघले आगामी दिनमा पनि आवश्यकता र परिस्थितिअनुसार प्रभावित नागरिकको सहयोगमा निरन्तर सहकार्य गर्ने प्रतिबद्धता जनाएको छ।
