: त्रिशूली नदीमा फेला परेका तथा हालसम्म पहिचान हुन नसकेका शवका आंशिक अंग धादिङको गजुरी गाउँपालिका-५ स्थित गलौंदी हाइटको ठूलो सामुदायिक वन क्षेत्रमा व्यवस्थापन गरिएको छ।
भोटेकोशी बाढीका कारण ज्यान गुमाएका व्यक्तिका शव तथा मानव अंगमध्ये पहिचान हुन नसकेका आंशिक अंगलाई भविष्यमा समेत आवश्यक परे पहिचान गर्न सकिने गरी व्यवस्थापन गरिएको प्रहरीले जनाएको छ।
जिल्ला प्रहरी कार्यालय धादिङका सूचना अधिकारी प्रहरी नायब उपरीक्षक प्रकाश दाहालका अनुसार शव तथा मानव अंग व्यवस्थापन गर्नुअघि आवश्यक कानुनी तथा वैज्ञानिक प्रक्रिया पूरा गरिएको थियो। पहिचानका लागि डीएनए नमुना संकलनलगायत आवश्यक प्रक्रिया पूरा गरेपछि मात्रै आंशिक अंग व्यवस्थापन गरिएको उनले बताए।
प्रहरीका अनुसार धादिङको त्रिशूली नदी किनार क्षेत्रमा हालसम्म ५६ वटा शव तथा मानव अंग फेला परेका छन्। तीमध्ये २७ वटा शव पोखरा पठाइएको छ भने ६ वटा शव काठमाडौंस्थित शिक्षण अस्पताल ९टिचिङ अस्पताल० पठाइएको छ। बाँकी २३ वटा शवका आंशिक अंग भने गजुरी-५ स्थित गलौंदी हाइटको ठूलो सामुदायिक वन क्षेत्रमा व्यवस्थापन गरिएको प्रहरीले जनाएको छ।
व्यवस्थापन गरिएका आंशिक अंगबाट भविष्यमा पहिचान खुल्न सक्ने अवस्थालाई ध्यानमा राखी आवश्यक विवरण तथा डीएनए नमुनालगायत प्रमाण सुरक्षित राखिएको प्रहरीले जनाएको छ।
