: बीपी कोइराला स्वास्थ्य विज्ञान प्रतिष्ठान धरानमा लामो समयदेखि रिक्त रहेका तीन प्रमुख पदाधिकारी नियुक्त भएका छन्। सरकारले प्रतिष्ठानको अस्पताल निर्देशक, शिक्षाध्यक्ष र रजिस्ट्रार पदमा नयाँ पदाधिकारी नियुक्त गरेको हो। स्वास्थ्यमन्त्री निशा मेहताले नवनियुक्त तीनै जना पदाधिकारीलाई नियुक्तिपत्र हस्तान्तरण गर्दै पद तथा गोपनीयताको शपथ गराएकी छिन्।
प्रतिष्ठानको अस्पताल निर्देशकमा डेन्टल विभागका डा. इन्द्र लिम्बू नियुक्त भएका छन्। धरानका स्थानीय बासिन्दा डा. लिम्बू यसअघि प्रतिष्ठानको डेपुटी अस्पताल निर्देशक तथा निमित्त उपकुलपतिको जिम्मेवारी सम्हालिसकेका अनुभवी चिकित्सक हुन्। निर्देशकमा नियुक्त भएपछि डा. लिम्बूले प्रतिष्ठानको सुधार र बिरामीलाई गुणस्तरीय स्वास्थ्य सेवा उपलब्ध गराउन प्रभावकारी भूमिका निर्वाह गर्ने बताएका छन्। प्रतिष्ठानमा देखिएका समस्या समाधान गर्दै सेवा प्रवाहलाई थप व्यवस्थित बनाउने उनको भनाइ छ।
त्यस्तै, प्रतिष्ठानको शिक्षाध्यक्षमा फोरेन्सिक विभागका डा. शिवेन्द्र झा नियुक्त भएका छन्। मधेश प्रदेशका बासिन्दा डा. झा यसअघि प्रतिष्ठानको डिन भइसकेका छन्। रजिस्ट्रारमा प्रतिष्ठानकै कर्मचारी धरनिधर बराल नियुक्त भएका छन्। बराल इटहरी निवासी हुन्। प्रतिष्ठानको उपकुलपतिमा यसअघि नै डा. स्मृति कार्की नियुक्त भइसकेकी छन्। उपकुलपति डा. कार्कीको सिफारिसका आधारमा तीनै जना पदाधिकारी नियुक्त गरिएको बताइएको छ।
यसअघि केपी शर्मा ओली प्रधानमन्त्री रहेका बेला नियुक्त भएका उपकुलपति डा. विक्रमप्रसाद श्रेष्ठ, शिक्षाध्यक्ष डा. सञ्जीव शर्मा, रजिस्ट्रार सूर्यप्रसाद सङ्ग्रौला र अस्पताल निर्देशक डा. जगतनारायण प्रसादलाई बालेन नेतृत्वको सरकारले पदबाट बर्खास्त गरेको थियो। नयाँ पदाधिकारी नियुक्तिसँगै बीपी प्रतिष्ठानको प्रशासनिक नेतृत्वले पूर्णता पाएको छ। प्रतिष्ठानको सेवा सुधार, आर्थिक व्यवस्थापन, शैक्षिक गतिविधि र बिरामीलाई प्रदान गरिने स्वास्थ्य सेवालाई प्रभावकारी बनाउने चुनौती नयाँ नेतृत्वसामु रहेको प्रतिष्ठानका डा. नारायणराज भट्टराईले बताए।
