। रसुवाको भोटेकोशी नदीमा आएको भीषण बाढीपछि माथिल्लो त्रिशूली ३ ‘ए’ जलविद्युत् आयोजनाको सुरुङभित्र फसेर उद्धार गरिएका दुई जनामध्ये एक जनाको अवस्था जटिल रहेको प्रधानमन्त्री कार्यालयले जनाएको छ ।
प्रधानमन्त्री कार्यालयले दिएको जानकारीअनुसार, सुरुङबाट दोस्रो पटक उद्धार गरिएका कविर महर्जनको अवस्था जटिल रहेको हो। उनलाई तत्कालै काठमाडौंको छाउनीस्थित वीरेन्द्र सैनिक अस्पताल ल्याएर सघन उपचार (आईसीयू) जारी राखिएको छ।
यसैगरी, सुरुमा उद्धार गरिएका अर्का व्यक्ति सञ्जय साहको स्वास्थ्य अवस्था भने सामान्य र स्थिर रहेको छ।
यद्यपि, उनी १० दिनसम्म सुरुङभित्रै फसेको हुनाले थप स्वास्थ्य परीक्षण र निगरानीका लागि उनलाई पनि छाउनीस्थित सैनिक अस्पतालमै ल्याइँदै गरेको प्रधानमन्त्री कार्यालयले जनाएको छ।
नेपाली सेनाको नेतृत्वमा नेपाल प्रहरी, सशस्त्र प्रहरी बल (एपीएफ) र अन्य विज्ञहरूको संयुक्त टोलीले शुक्रबार बिहानै उनीहरूको जीवितै उद्धार गरेको थियो।
गत भदौ १० गतेको बाढीपछि आयोजनाको सुरुङभित्र मानिसहरू फसेको आशंकामा सुरक्षा निकाय र प्राविधिकहरूको टोलीले लगातार उद्धारको प्रयास जारी राखेको थियो। १० दिन लामो निरन्तर प्रयासपछि आज बिहान उनीहरूलाई जीवितै बाहिर निकाल्न सफलता मिलेको हो।
