: विराटनगरमा आज ५९ औँ राधाकृष्ण रथयात्रा हुँदैछ । धार्मिक उत्सवका रूपमा विशेष महत्व राख्ने रथयात्रामा नेपालका विभिन्न स्थानसँगै भारतका सीमावर्ती क्षेत्रबाट समेत गरी करिब पाँच लाख भक्तजन सहभागी हुने आयोजकको अपेक्षा छ ।
राधाकृष्ण मन्दिरबाट दिउँसो ३ बजे रथयात्रा सुरु हुनेछ । भक्तजनको ठूलो सहभागितालाई ध्यानमा राख्दै आयोजकले व्यवस्थापनदेखि सुरक्षासम्मका तयारी पूरा गरिएको जनाएको छ । यसपटकको रथयात्राको मुख्य विशेषता डीजे साउन्डको प्रयोग नहुनु हो । धार्मिक कार्यक्रमको मौलिकता र आध्यात्मिक वातावरणलाई प्राथमिकता दिँदै आयोजकले डीजेको विकल्पमा भजन–कीर्तन, धार्मिक झाँकी र परम्परागत प्रस्तुतिलाई अघि सारेको छ ।
रथमा जडान गरिएका दुईवटा हर्न माइकमार्फत भगवानका भजन बजाइनेछन् भने रथयात्राको मार्गमा विभिन्न भजन मण्डलीले प्रत्यक्ष भजन–कीर्तन प्रस्तुत गर्नेछन् । पछिल्लो समय धार्मिक तथा सांस्कृतिक कार्यक्रममा चर्को डीजे साउन्डको प्रयोग बढ्दै गएपछि यसपटक परम्परागत शैलीलाई निरन्तरता दिन खोजिएको राधाकृष्ण मन्दिर व्यवस्थापन समितिका अध्यक्ष कैलाश रेग्मीले बताए ।
विराटनगरको राधाकृष्ण रथयात्राको इतिहास झण्डै एक शताब्दी पुरानो छ । विसं १९८८ मा राधाकृष्ण मन्दिर स्थापना भएपछि खट यात्राबाट सुरु भएको परम्परा विसं २०२५ देखि भव्य रथयात्राका रूपमा विस्तार भएको हो । खट यात्रालाई समेत गणना गर्दा यस वर्ष ९५औँ यात्रा हुँदैछ भने रथयात्राको भने ५९औँ संस्करण हो ।null
रथयात्रा राधाकृष्ण मन्दिरबाट सुरु भएर तीनपैनी चोक, गोल्छा चोक, मेनरोड, ट्राफिक चोक, रोडशेष चोक र महेन्द्र चोक हुँदै कोशी राजमार्गतर्फ अघि बढ्नेछ । बरगाछी र दुर्गा चोक हुँदै पुनः राधाकृष्ण मन्दिरमा पुगेर यात्रा समापन हुनेछ । करिब आठ किलोमिटरको दूरीमा सञ्चालन हुने रथयात्राका क्रममा ४४ स्थानमा विश्रामको व्यवस्था गरिएको छ ।
यसपटक धार्मिक आस्थासँगै मानवीय सेवाको उद्देश्यलाई पनि रथयात्रासँग जोडिएको छ । रथयात्राका क्रममा भेटीका रूपमा संकलन हुने रकम भोटेकोशी बाढीपीडितको राहतमा खर्च गरिने आयोजकले जनाएको छ । नगर परिक्रमा गराइने तीनवटा दानपेटिकाबाट उठेको रकम प्रधानमन्त्री राहत कोषमा जम्मा गरेर बाढीपीडितलाई सहयोग गर्ने तयारी छ ।
रथयात्रामा सहभागी हुने भक्तजनको सुरक्षा तथा भिड व्यवस्थापनलाई प्रहरीले प्राथमिकतामा राखेको छ । बिहानैदेखि ठूलो संख्यामा सुरक्षाकर्मी परिचालन गरिएको छ । भिडको निगरानी र सम्भावित गतिविधिको अनुगमनका लागि ड्रोनसमेत प्रयोग गरिने मोरङ प्रहरी प्रमुख एसपी कवित कटवालले बताए । रथयात्राका क्रममा उच्छृंखल गतिविधि गर्ने तथा आपराधिक क्रियाकलापमा संलग्न हुनेलाई तत्काल नियन्त्रणमा लिएर कानुनी कारबाही गरिने प्रहरीले जनाएको छ ।
रथयात्रालाई व्यवस्थित बनाउन १ हजार १ सदस्यीय मूल समारोह समिति गठन गरिएको छ । स्वास्थ्य, खानेपानी, सरसफाइ, विद्युत्, स्वयंसेवक परिचालन, झाँकी, सञ्चार तथा प्रचारप्रसारलगायतका काम हेर्न २१ वटा उपसमिति परिचालन गरिएको आयोजकले जनाएको छ । भक्तजनको ठूलो सहभागिता रहने अपेक्षा गरिएको रथयात्रालाई सुरक्षित, व्यवस्थित र धार्मिक वातावरणमा सम्पन्न गर्न आयोजक तथा सुरक्षा निकायले आवश्यक तयारी पूरा गरेका छन् ।
