: पृथ्वी राजमार्गअन्तर्गत धादिङको गजुरी गाउँपालिका-२ स्थित परेवाभिरमा सडक मर्मतका लागि १२ घण्टा सवारी आवागमन पूर्ण रूपमा बन्द गरिने भएको छ।
भोटेकोशीमा आएको बाढीका कारण परेवाभिरस्थित पृथ्वी राजमार्गमा क्षति पुगेपछि हाल उक्त सडक एकतर्फी रूपमा सञ्चालन हुँदै आएको छ। क्षतिग्रस्त सडकको आवश्यक मर्मत तथा सुधार गर्न सवारी आवागमन बन्द गर्न लागिएको हो। जिल्ला प्रशासन कार्यालय धादिङका अनुसार सडक मर्मतका लागि भदौ २० गते शनिबार बिहान ६ बजेदेखि बेलुका ६ बजेसम्म परेवाभिर हुँदै सञ्चालन हुने अत्यावश्यकबाहेकका सबै सवारीसाधनको आवागमनमा पूर्ण रूपमा रोक लगाइनेछ। उक्त अवधिमा एम्बुलेन्स र शववाहनबाहेक अन्य कुनै पनि सवारीसाधनलाई परेवाभिर हुँदै आवतजावत गर्न दिइने छैन।
प्रमुख जिल्ला अधिकारी लक्ष्मी पाण्डे गौतमका अनुसार क्षतिग्रस्त सडकको आवश्यक मर्मत कार्य सम्पन्न गरी सुरक्षित रूपमा यातायात सञ्चालन गर्न १२ घण्टा सवारी आवागमन बन्द गर्न लागिएको हो। सडक मर्मतका कारण हुने अवरोधलाई मध्यनजर गर्दै सम्बन्धित सवारी चालक तथा यात्रुलाई सोहीअनुसार यात्रा व्यवस्थापन गर्न प्रशासनले आग्रह गरेको छ।
