: विराटनगरमा घरको ट्रष्ट निर्माणको काम गर्ने क्रममा एक तलामाथिबाट खसेर एक जना मजदुरको मृत्यु भएको छ। मृत्यु हुनेमा विराटनगर महानगरपालिका–१२ दरैयाका ३६ वर्षीय गौरव राजवंशी रहेका छन्।
उनको शुक्रबार उपचारका क्रममा मृत्यु भएको प्रहरीले जनाएको छ। प्रहरीका अनुसार विराटनगर महानगरपालिका–३ स्थित वन कार्यालय नजिक बिजुकुमार थापाको घरमा ट्रष्ट निर्माणको काम भइरहेको थियो । सोही क्रममा बिहान करिब १० बजे राजवंशी एक तलामाथिबाट भुइँमा खसेका थिए।
घटनामा गम्भीर घाइते भएका राजवंशीलाई तत्काल उपचारका लागि विराटनगरस्थित मोरङ सहकारी अस्पताल लगिएको थियो । उपचारकै क्रममा चिकित्सकले उनलाई मृत घोषणा गरेका थिए। घटनाका बारेमा जानकारी पाएपछि जिल्ला प्रहरी कार्यालय मोरङबाट इन्स्पेक्टर लेखनाथ दाहालको नेतृत्वमा प्रहरी टोली घटनास्थल पुगेको थियो।
प्रहरीले आवश्यक कानुनी प्रक्रिया पूरा गरी राजवंशीको शव पोस्टमार्टमका लागि कोशी अस्पताल पठाएको छ । घटनाको कारण र निर्माणस्थलमा अपनाइएको सुरक्षासम्बन्धी विषयमा प्रहरीले थप अनुसन्धान गरिरहेको छ ।
