: त्रिशूली नदीमा आएको बाढीले बगाएर ल्याएका सामानहरू सुरक्षित राखी सम्बन्धित धनीलाई फिर्ता गर्न धादिङ प्रहरीले माइकिङमार्फत सर्वसाधारणलाई आग्रह गरेको छ।
बाढीपछि त्रिशूली नदी किनार तथा आसपासका क्षेत्रमा विभिन्न सामानहरू भेटिन थालेपछि प्रहरीले त्यस्ता सामान आफूखुसी प्रयोग, बिक्री वा अन्य प्रयोजनमा नलगाउन आग्रह गरेको छ। भेटिएका सामान सम्बन्धित धनीको पहिचान भएमा तत्काल फिर्ता गर्न प्रहरीले अनुरोध गरेको छ।
प्रहरीका अनुसार बाढीले बगाएर ल्याएका सामान कसैको घर, पसल वा अन्य स्थानमा भेटिएमा नजिकको प्रहरी कार्यालयमा जानकारी गराउन सकिनेछ। सामानको वास्तविक धनीको पहिचान गरेर कानुनी प्रक्रियाअनुसार सम्बन्धित व्यक्तिलाई नै ती सामान फिर्ता गरिने प्रहरीले जनाएको छ।
जिल्ला प्रहरी कार्यालय धादिङका सूचना अधिकारी तथा प्रहरी नायब उपरीक्षक (डिएसपी) प्रकाश दाहालका अनुसार भेटिएका सामान फिर्ता नगरी आफैंले राखेको वा प्रयोग गरेको पाइएमा कानुनबमोजिम कडा कारबाही गरिनेछ।
